2025 جىلعى بۋكەر ادەبي سىيلىعىنىڭ جەڭىمپازى بەلگىلى بولدى، دەپ حابارلايدى "ادىرنا" ۇلتتىق پورتالى.
بيىلعى جىلى بەدەلدى ماراپاتقا بريتان-ۆەنگر جازۋشىسى دەۆيد سولوي ءوزىنىڭ ء«تان» («Flesh») رومانى ارقىلى يە بولدى. ادەبي قازىلار القاسى بۇل شىعارمانى «ەرەكشە ءارى بىرەگەي تۋىندى» دەپ اتادى.
سىيلىقتى تابىستاۋ ءراسىمى لوندوندا ءوتتى. بيىلعى قازىلار القاسىنا يرلانديالىق دراماتۋرگ روددي دويل توراعالىق ەتتى.
ء«بىز قىسقا تىزىمگە ەنگەن التى كىتاپتى بەس ساعاتتان استام تالقىلادىق. بىراق قايتا-قايتا ورالعان ءبىر عانا شىعارما بولدى — ول ء„تان“. ءبىز مۇندايدى بۇرىن ەشقاشان وقىعان ەمەسپىز. كەي تۇستارىندا بۇل اۋىر، مۇڭدى كىتاپ، الايدا ونى وقۋ — ناعىز ءلاززات»، — دەدى روددي دويل.
دەۆيد سولويدىڭ التىنشى رومانى - ء"تان". شىعارما ۆەنگرلىك جاس جىگىت يشتۆاننىڭ ءومىر جولىن باياندايدى: ول قاراپايىم تۇرعىن اۋداننان باستاپ لوندونداعى بايلار الەمىنە دەيىن ءتۇرلى ءومىر كەزەڭدەرىنەن وتەدى.
«اۆتور بەتتەگى بوس كەڭىستىكتى ەرەكشە پايدالانادى. ءار ءسوزدىڭ ءمانى بار، ءتىپتى ءسوز ارالىق ۇزىلىستەردىڭ ءوزى ماعىنالى. بۇل كىتاپ — ءومىر تۋرالى، ادام بولمىسىنىڭ توسىن ساتتەرى تۋرالى. ونى وقي وتىرىپ، ءتىرى ەكەنىڭە قۋانسىن كەلەدى»، — دەپ سيپاتتادى جەڭىمپاز شىعارمانى قازىلار القاسىنىڭ توراعاسى.
ءوز كەزەگىندە دەۆيد سولوي ء«تان» رومانىن قازىرگى ەۋروپا مەن ونداعى مادەني جانە ەكونوميكالىق ايىرماشىلىقتارعا ارناعانىن ايتتى.
«مەن ۆەنگريا مەن انگليا اراسىندا ءومىر ءسۇردىم، سوندىقتان ەكى ەلدىڭ اراقاتىناسى مەن ءومىردىڭ فيزيكالىق سەزىمىن سيپاتتاعىم كەلدى. ءبىزدى نە ايىرسا دا، ءبارىمىزدى ءتىرى ەكەنىمىز بىرىكتىرەدى»، — دەدى جازۋشى.
ايتا كەتەيىك، وسىعان دەيىن ادەبي سىيلىققا كىمنىڭ شىعارمالارى ۇمىتكەر بولعانىن حابارلاعان ەدىك.
