ورال قالاسىنداعى مەكتەپتەن تىس جۇمىس ورتالىعىندا وقۋشىلاردىڭ بوس ۋاقىتىن ءتيىمدى پايدالانۋ ماقساتىندا ەلۋگە جۋىق ۇيىرمەدە التى مىڭنان استام وقۋشى تاربيەلەنىپ، قوسىمشا ءبىلىم الۋدا. ورتالىقتىڭ ديرەكتورى تىلەك ادىلگەرەيۇلىنىڭ ايتۋىنشا، بۇگىندە ءبىلىم وشاعىندا ءتالىم العان دارىندى بالالار ءوز ومىرلەرىن وسى ورتالىقپەن بايلانىستىرىپ، قازىر بىرقاتارى ۇزەڭگىلەس ارىپتەستەرىنە اينالسا، ەندى ءبىرى جوعارى وقۋ ورىندارىندا ءبىلىم الۋدا.
ورال قالاسىنىڭ مەكتەپتەن تىس جۇمىس ورتالىعى بالالار مەن جاسوسپىرىمدەردىڭ شىعارماشىلىق قابىلەتتەرىن دامىتۋدى ماقسات ەتىپ، وسى باعىتتا ەلەۋلى جۇمىستار اتقارۋدا. قازىرگى تاڭدا ورتالىقتا ەلۋگە جۋىق ۇيىرمەدە التى مىڭنان استام وقۋشى تاربيەلەنىپ، قوسىمشا ءبىلىم الۋ مۇمكىندىگىنە يە بولۋدا. ورتالىقتىڭ ديرەكتورى تىلەك قۋانىشكەرەەۆتىڭ ايتۋىنشا، ءبىلىم بەرۋ نىسانىنىڭ جۇمىسى ءتورت نەگىزگى باعىتتا جۇرگىزىلەدى: كوركەم ەستەتيكالىق، الەۋمەتتىك-پەداگوگيكالىق، سپورتتىق جانە اسكەري-پاتريوتتىق باعىتتار. بيىلعى جىلى عيماراتقا جوندەۋ جۇرگىزىلىپ، رەڭى جاڭارىپ، تاربيلەنۋشىلەر مەن ۇستازدارعا جايلى جاعداي جاسالعان.
ورتالىق نەگىزىنەن 1992 جىلدان باستاپ مەكتەپتەن تىس جۇمىس ورتالىعى اتاۋىنا يە بولدى، وعان دەيىن «پيونەرلەر ءۇيى» دەپ اتالىپتى. ەلىمىز تاۋەلسىزدىك العاننان بەرى 100 مىڭنان اسا وقۋشى ءتالىم الىپتى. جۇمىس ودان ءارى جالعاسا بەرەدى.– كوركەم ەستەتيكالىق باعىت – وقۋشىلاردىڭ شىعارماشىلىق قابىلەتتەرىن دامىتۋعا باعىتتالعان ۇيىرمەلەرگە تولى. دومبىرا، گيتارا، بي، ۆوكال، كوركەم سۋرەت جانە ساندىك قولدانبالى ونەر سياقتى ءتۇرلى باعىتتاردا بالالار وزدەرىن جان-جاقتى كورسەتۋ مۇمكىندىگىن الادى. بۇل ۇيىرمەلەر بالالاردىڭ ونەرگە دەگەن سۇيىسپەنشىلىگىن ارتتىرىپ، ولاردىڭ جەكە تۇلعاسىن قالىپتاستىرۋدا ماڭىزدى ءرول اتقارادى.الەۋمەتتىك-پەداگوگيكالىق باعىت – وقۋشىلاردىڭ كوشباسشىلىق قاسيەتتەرىن دامىتۋعا باعىتتالعان. بۇل باعىتتا ءتىل ۇيىرمەلەرى، كوشباسشىلار مەكتەبى، دەباتتار جانە باسقا دا قوعامدىق ءىس-شارالار ۇيىمداستىرىلادى. بالالار وسىندا وزدەرىن جاڭا الەۋمەتتىك ورتادا سىناپ، ءوز پىكىرلەرىن دالەلدەپ، كوماندالىق جۇمىس داعدىلارىن دامىتادى.سپورتتىق باعىتتا دا كوپتەگەن ۇيىرمەلەر جۇمىس ىستەيدى. اۋە كەمەلەرىن مۇسىندەۋ، كارتينگ، توعىزقۇمالاق، باسكەتبول، ۆولەيبول سياقتى سپورت تۇرلەرىمەن اينالىساتىن وقۋشىلار جىل سايىن وبلىستىق جانە رەسپۋبليكالىق دەڭگەيدە ءتۇرلى جارىستارعا قاتىسىپ، جۇلدەلى ورىندارعا يە بولۋدا. اسىرەسە، اۋە كەمەلەرىن مۇسىندەۋدەن جانە توعىزقۇمالاقتان كوماندا مۇشەلەرى جىل سايىن ءبىرىنشى ورىندى جەڭىپ الىپ ءجۇر.اسكەري-پاتريوتتىق باعىتتا دا بالالاردىڭ وتانىنا دەگەن سۇيىسپەنشىلىگى مەن پاتريوتتىق سەزىمىن نىعايتۋ ماقساتىندا ءتۇرلى ءىس-شارالار ۇيىمداستىرىلادى. بۇل باعىت وقۋشىلاردىڭ ەلجاندىلىق رۋحىن قالىپتاستىرۋعا، ءوز جەرىنە، تاريحىنا جانە مادەنيەتىنە قۇرمەتپەن قاراۋعا باعىتتالعان، – دەدى قالالىق مەكتەپتەن تىس جۇمىس ورتالىعىنىڭ ديرەكتورى تىلەك ادىلگەرەيۇلى.
ورتالىقتىڭ جۇمىس اۋقىمى كەڭەيگەن
ورتالىقتىڭ قۇرىلىمى التى بولىمشەدەن تۇرادى. بۇل بولىمشەلەر ورال قالاسىنىڭ ءارتۇرلى اۋداندارىندا ورنالاسقان: ەت كومبيناتى 33 ججوم، 16 مەكتەپتە، جەلاەۆ كەنتىندە، دەركول شاعىن اۋدانىندا 49, 52 مەكتەپتەر بازاسىندا، بور تاۋى شاعىن اۋدانىنداعى 18 مەكتەبىندە جانە 20, 51 مەكتەپتەردە بولىمشەلەر جۇمىس ىستەيدى. سونىمەن قاتار، ورتالىق وقۋشىلاردىڭ كانيكۋلى كەزدەرىندە جۇمىسىن ەرەكشە قىزدىرىپ، بالالاردىڭ بوس ۋاقىتىن ءتيىمدى پايدالانۋ ءۇشىن كوپتەگەن ءىس-شارالار ۇيىمداستىرادى. ولاردىڭ قاتارىندا ءوزارا پىكىر الماسۋ، كونكۋرستار مەن شىعارماشىلىق باعىتتاعى شارالار بار. اسىرەسە، ءبىلىم الۋشىلار وسى دەمالىس ساتتەرىندە ۇيىرمەلەرگە جوعارى قىزىعۋشىلىقپەن قاتىساتىن كورىنەدى.
جەتىستىكتەر دە جەتەرلىك
مەكتەپتەن تىس جۇمىس ورتالىعىنىڭ وقۋشىلارى ءتۇرلى دەڭگەيدەگى جارىستاردا جوعارى ناتيجەلەر كورسەتىپ، ءۇمىت ارتقان اتا-انالار مەن ۇستازداردىڭ ەڭبەگى لايىقتى باعالانىپ كەلەدى. 2024-2025 وقۋ جىلىندا تالانتتى ۇيىرمە مۇشەلەرى «تەاتر عاجايىپ الەمى» اتتى رەسپۋبليكالىق بايقاۋدا ءبىرىنشى ورىن الىپ، ۇلكەن جەتىستىككە جەتتى. سونىمەن قاتار، وبلىستىق جارىستاردا اۋە كەمەلەرىن مۇسىندەۋ جانە باسقا دا سپورتتىق ۇيىرمەلەردە ۇزدىك ناتيجەلەر كورسەتىپ، وزدەرىنىڭ شىعارماشىلىق جانە سپورتتىق قابىلەتتەرىن تانىتتى. «اق شاعالا» رەسپۋبليكالىق بيشىلەر بايقاۋىندا دا ورتالىقتىڭ ونەرلى ورەندەرى ءبىرىنشى ورىنعا تابان تىرەپ، ونەر سالاسىندا دا بيىك بەلەستەرگە كوتەرىلدى.
بۇل جەتىستىكتەر ورتالىقتىڭ جۇمىس ساپاسىنىڭ جوعارى دەڭگەيدە ەكەنىن جانە بالالاردىڭ شىعارماشىلىعى مەن قابىلەتتەرىنىڭ جان-جاقتى دامىپ، ءارتۇرلى سالادا ءوز تالانتتارىن تانىتۋعا مۇمكىندىك العانىن ايقىن دالەلدەيدى. بۇگىندە تالانتتاردىڭ توماعىسىن سىپىرۋ جولىندا جۇزدەن اسا ۇستازدار ۋاقىتپەن ساناسپاي قىزمەت اتقارۋدا.
