مەملەكەت باسشىسى قاسىم-جومارت توقاەۆ رەسەي فەدەراتسياسى ۇكىمەتى توراعاسىنىڭ ءبىرىنشى ورىنباسارى دەنيس مانتۋروۆتى قابىلدادى. بۇل تۋرالى بۇگىن، 10 قاراشادا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەزدەسۋدە قازاقستان پرەزيدەنتىنىڭ ماسكەۋگە جاسايتىن مەملەكەتتىك ساپارى اياسىندا قارالاتىن كوپجوسپارلى ىنتىماقتاستىقتىڭ باستى باعىتتارى تالقىلاندى.
قاسىم-جومارت توقاەۆ الداعى ساپارعا ەرەكشە ءمان بەرىپ وتىرعانىن جانە كەلىسسوزدەردىڭ تابىستى وتەتىنىنە سەنىمدى ەكەنىن جەتكىزدى.
مەملەكەت باسشىسى ەكى ەل ۇكىمەتتەرىنىڭ بەلسەندى ءارى ۇيلەسىمدى جۇمىسىنىڭ ارقاسىندا رەسەي قازاقستاننىڭ جەتەكشى ساۋدا-ەكونوميكالىق سەرىكتەستەرىنىڭ ءبىرى بولىپ قالا بەرەتىنىنە توقتالدى.
قاسىم-جومارت توقاەۆ پرەزيدەنت ۆلاديمير پۋتينمەن ەكىجاقتى تاۋار اينالىمىنىڭ كولەمىن تاياۋ ارادا 30 ميلليارد دوللارعا دەيىن ارتتىرۋ جونىندەگى ۋاعدالاستىققا قول جەتكىزىلگەنىن ەسكە سالدى.
پرەزيدەنت رەسەي فەدەراتسياسى قازاقستان ەكونوميكاسىنا قارجى سالعان جەتەكشى ينۆەستورلاردىڭ ءبىرى بولىپ وتىرعانىنا نازار اۋداردى. بىلتىر جالپى ينۆەستيتسيا كولەمى 4 ميلليارد دوللارعا جەتتى.
مەملەكەت باسشىسى ەلىمىزدە كوپتەگەن رەسەيلىك كومپانيا جەمىستى جۇمىس ىستەپ جاتقانىن مالىمدەدى. بۇل ەكى ەل اراسىنداعى ءوزارا سەنىمنىڭ جوعارى دەڭگەيىن كورسەتەدى.
دەنيس مانتۋروۆ قوناقجايلىق تانىتقانى ءۇشىن قاسىم-جومارت توقاەۆقا ريزاشىلىق ءبىلدىرىپ، رەسەيلىك تاراپتىڭ ەكىجاقتى بايلانىستاردى ودان ءارى كەڭەيتۋگە دايىن ەكەنىن راستادى.
مەملەكەت باسشىسى ەكى ەل اراسىنداعى دوستىق پەن ىنتىماقتاستىقتى نىعايتۋعا، سونداي-اق الەۋمەتتىك-ەكونوميكالىق جانە مادەني قارىم-قاتىناستاردى دامىتۋعا ەلەۋلى ۇلەس قوسقانى ءۇشىن دەنيس مانتۋروۆتى ءى دارەجەلى «دوستىق» وردەنىمەن ماراپاتتادى.
