ۇلىبريتانيانىڭ بريتاندىق حابار تاراتۋ كورپوراتسياسىنىڭ (BBC) باس اتقارۋشى ديرەكتورى تيم دەيۆي مەن BBC News جاڭالىقتار ءبولىمىنىڭ جەتەكشىسى دەبورا تەرنەسس اقش پرەزيدەنتى دونالد ترامپتىڭ ءسوزىن بۇرمالاۋعا قاتىستى ايىپتاۋلاردان كەيىن وتستاۆكاعا كەتەتىنىن مالىمدەدى، دەپ حابارلايدى «ادىرنا» ءتىلشىسى.
تيم دەيۆي ءوزىنىڭ قىزمەتىنەن كەتۋ تۋرالى حاتىندا قاتەلىكتەر جىبەرىلگەنىن مويىندادى.
«BBC ءمىنسىز ەمەس، ءبىز ارقاشان اشىقتىق پەن ايقىندىق قاعيداتىن ۇستانۋىمىز كەرەك. بۇل — مەنىڭ شەشىمىمنىڭ جالعىز سەبەبى ەمەس، بىراق BBC News توڭىرەگىندەگى قازىرگى تالقىلاۋلار وعان اسەر ەتتى. جالپى كورپوراتسيا جاقسى جۇمىس ىستەپ كەلەدى، الايدا كەيبىر قاتەلىكتەرگە جول بەرىلدى. باس ديرەكتور رەتىندە مەن وسى ءۇشىن تولىق جاۋاپكەرشىلىكتى ءوز موينىما الۋىم كەرەك»،–دەدى ول.
ءوز كەزەگىندە دەبورا تەرنەسس BBC بەدەلىنە نۇقسان كەلتىرە باستاعانىن جەتكىزدى.
«پرەزيدەنت ترامپقا ارنالعان Panorama باعدارلاماسى توڭىرەگىندەگى داۋ-داماي مەن ەرەكشە قۇرمەتتەيتىن ۇيىمعا نۇقسان كەلتىرەتىن دەڭگەيگە جەتتى. ءيا، قاتەلىك بولدى، بىراق BBC News ۇيىم رەتىندە بىرجاقتىلىق تانىتتى دەگەن ايىپتاۋلار شىندىققا جاناسپايدى»،–دەپ تولىقتىردى ول.
اق ءۇي باسشىسى دونالد ترامپ Truth Social-دا BBC باس ديرەكتورىنىڭ وتستاۆكاسىنا قاتىستى پىكىر ءبىلدىردى.
«بارلىعى وتستاۆكاعا كەتىپ جاتىر نەمەسە جۇمىستان قۋىلدى، سەبەبى ولار مەنىڭ 6 قاڭتارداعى تاماشا ءسوزىمدى بۇرمالاعاندارى ءۇشىن ۇستالدى. بۇل — پرەزيدەنتتىك سايلاۋعا ارالاسۋعا تىرىسقان وتە ادال ەمەس ادامدار. وعان قوسا، ولار – كوپشىلىك ءبىزدىڭ №1 وداقتاسىمىز دەپ سانايتىن ەلدىڭ وكىلدەرى. قانداي قورقىنىشتى جاعداي! بۇل – دەموكراتيا ءۇشىن ناعىز سوراقىلىق»– دەپ جازدى ترامپ.
ايتا كەتەيىك، تيم دەيۆي BBC باس ديرەكتورى قىزمەتىن 2020 جىلدىڭ قىركۇيەگىنەن بەرىاتقارىپ كەلەدى. بۇعان دەيىن ول جەتى جىل بويى كورپوراتسيانىڭ كوممەرتسيالىق تارماعى — BBC Studios-تى باسقارعان. جالپى ونىڭ BBC-دەگى ەڭبەك ءوتىلى 20 جىلدى قۇرايدى. ال دەبورا تەرنەسس 2022 جىلدان باستاپ BBC News جەتەكشىسى قىزمەتىن اتقارعان. ول 40-تان استام تىلدە حابار تاراتاتىن جانە الەم بويىنشا 500 ميلليوننان استام كورەرمەنى بار جاڭالىقتار قىزمەتىنىڭ 5 مىڭنان استام قىزمەتكەرىن باسقارعان.
