اقش ارمياسىنىڭ اسكەري قولباسشىلىعى ەل پرەزيدەنتى دونالد ترامپقا يران اۋماعىنان شامامەن 450 كگ جوعارى بايىتىلعان ۋراندى باسىپ الىپ، ەلدەن شىعارۋ جونىندەگى جوسپاردى ۇسىندى. بۇل تۋرالى 1 ساۋىردە The Washington Post جازدى، دەپ حابارلايدى «ادىرنا» ءتىلشىسى.
مالىمەتكە سايكەس، جوسپار اياسىندا يرانعا اۋە ارقىلى جەر قازۋ تەحنيكاسىن جەتكىزۋ جانە جۇك ۇشاقتارىنا ارنالعان ۇشۋ-قونۋ جولاعىن سالۋ قاراستىرىلعان. وسى ۇشاقتارمەن راديواكتيۆتى ماتەريال يسلام رەسپۋبليكاسىنىڭ اۋماعىنان سىرتقا شىعارىلۋى ءتيىس.
باسىلىمنىڭ جازۋىنشا، بۇل جوسپار ترامپتىڭ سۇرانىسىنان كەيىن وتكەن اپتادا ۇسىنىلعان. بۇعان دەيىن مۇنداي جوسپاردى اقش اكىمشىلىگى قاراستىرىپ جاتقانى تۋرالى The Wall Street Journal دا حابارلاعان ەدى.
يرانداعى ۋراندى باسىپ الۋعا باعىتتالعان ىقتيمال وپەراتسيا جوعارى تاۋەكەلدى ارنايى وپەراتسيا رەتىندە باعالانىپ وتىر. The Washington Post كەلتىرگەن ساراپشىلاردىڭ پىكىرىنشە، مۇنداي كۇردەلى تاپسىرما بۇرىن-سوڭدى سوعىس جاعدايىندا قويىلماعان. بۇل ميسسيانى ورىنداۋ ءۇشىن جۇزدەگەن نەمەسە مىڭداعان اسكەري قىزمەتكەردى جانە اۋىر تەحنيكانى اۋە ارقىلى جەتكىزۋ قاجەت بولۋى مۇمكىن. ولار راديواكتيۆتى ماتەريالداردى قازىپ الىپ، شىعارۋ جۇمىستارىن قامتاماسىز ەتەدى.
جۋرناليستەر تىلدەسكەن اقش قورعانىس مينيسترلىگىنىڭ بۇرىنعى قىزمەتكەرلەرىنىڭ ايتۋىنشا، مۇنداي جۇمىستار بىرنەشە اپتاعا سوزىلىپ، يران اۋماعىنىڭ تەرەڭىندە، اتىس جاعدايىندا جۇرگىزىلۋى ىقتيمال.
اقش اكىمشىلىگى يرانعا ۇسىنعان سوعىستى توقتاتۋ جونىندەگى 15 تارماقتان تۇراتىن جوسپاردىڭ ىشىندە تەگەرانعا جوعارى بايىتىلعان ۋراننان باس تارتۋ تالابى دا بار. يران بۇل تالاپتى قابىلداماعانىمەن، سوعىس باستالماي تۇرىپ-اق ۋراندى بايىتۋ دەڭگەيىن تومەندەتۋگە دايىن ەكەنىن جەتكىزگەن.
اقش اسكەرى يران ۋرانىن باسىپ الۋ جوسپارىنا قاتىستى اق ءۇيدىڭ ءباسپاسوز حاتشىسى كەرولاين ليۆيتت تۇسىنىكتەمە بەردى.
«پەنتاگوننىڭ مىندەتى — باس قولباسشىعا مۇمكىن بولاتىن بارلىق نۇسقانى ۇسىنۋ ءۇشىن دايىندىق جۇرگىزۋ. بۇل پرەزيدەنت ناقتى شەشىم قابىلدادى دەگەندى بىلدىرمەيدى»، — دەپ اتاپ ءوتتى ول.
اق ءۇي باسشىسى دونالد ترامپ پەن اقش قورعانىس مينيسترلىگىنىڭ باسشىسى پيت حەگسەت بىرنەشە رەت اقش پەن ءيزرايلدىڭ يرانعا قارسى سوعىستاعى ماقساتى — يسلام رەسپۋبليكاسىنىڭ يادرولىق قارۋ جاساۋىنا جول بەرمەۋ ەكەنىن مالىمدەگەن. ماگاتە دەرەكتەرىنە سايكەس، يراندا شامامەن 60%-عا دەيىن بايىتىلعان 440 كگ-عا جۋىق ۋران بار. بۇل — يادرولىق قارۋ جاساۋعا قاجەتتى بايىتۋ دەڭگەيىنە وتە جاقىن كورسەتكىش.
