امەريكادا قازاق مۋزىكانتى قايتىس بولدى، دەپ حابارلايدى "ادىرنا" kznews-كە سىلتەپ.
اقش-تا سكۋتەر قاعىپ كەتكەن قازاق قىزى قايتىس بولدى. قايعىلى جاعداي تۋرالى كۇلاش بايسەيىتوۆا اتىنداعى مەكتەپتىڭ اكىمشىلىگى حابارلادى.
ءمولدىر جولتاي – وسى مەكتەپتىڭ تۇلەگى. ول كاسىبي مۋزىكانتتاردى دايىندايتىن دارىندى بالالارعا ارنالعان مەكتەپتى 2012 جىلى بىتىرگەن.
مارقۇمنىڭ تۋىستارى سوت ساراپتاماسىنان وتكىزىپ، ونىڭ دەنەسىن ەلگە جەتكىزۋ ءۇشىن قارجىلاي كومەك سۇرادى.
«2012 جىلعى بەتكە ۇستار تۇلەگىمىز ءمولدىر جولتاي جازاتايىم وقيعادان جان ءتاسىلىم ەتتى. دارىندى جان، ومىرگە قۇشتار، ءالى دە تالاي شىعارماشىلىق جەتىستىكتەرىمەن ەلدى قۋانتادى دەگەن ءۇمىتىمىز زور ەدى. اتتەڭ، جازمىشتان وزمىش جوق. مەكتەپ ۇجىمى اتىنان جاقىن تۋىستارىنا قايعىسىنا ورتاقتاسىپ، كوڭىل بىلدىرەمىز»،- دەلىنگەن حابارلامادا.
28 جاستاعى قىزدى سكۋتەر قاعىپ كەتكەن. ەلىمىزدىڭ ءسىم قايعىلى جاعدايدىڭ ورىن العانىن راستادى.
"ادىرنا" ۇلتتىق پورتالى
