اقش-تىڭ ايداحو شتاتىندا وتكەن Gunfighter Skies اۋە شوۋى كەزىندە ەكى اسكەري ۇشاق اۋەدە سوقتىعىستى، دەپ حابارلايدى "ادىرنا" ۇلتتىق پورتالى.
وقيعا سالدارىنان ەكيپاج مۇشەلەرى كاتاپۋلتپەن سەكىرىپ ۇلگەرگەن.
اپات 17 مامىر كۇنى ماۋنتين-حوۋم اسكەري اۋە بازاسى ماڭىندا وتكەن اۆياشوۋدىڭ ەكىنشى كۇنى بولعان. اۋەدە دەمونستراتسيالىق ۇشۋ ورىنداپ جۇرگەن اقش اسكەري-تەڭىز كۇشتەرىنە تيەسىلى ەكى EA-18G Growler ۇشاعى سوقتىعىسقان. وقيعادان كەيىن ءورت شىعىپ، اسكەري بازا اۋماعى ۋاقىتشا جابىلدى. سونداي-اق اۆياشوۋدىڭ قالعان باعدارلاماسى توقتاتىلدى. قازىرگى ۋاقىتتا وقيعانىڭ ءمان-جايى بويىنشا تەرگەۋ باستالعان.
رەسمي مالىمەتكە سايكەس، ءتورت ەكيپاج مۇشەسىنىڭ بارلىعى كاتاپۋلتپەن سەكىرىپ، امان قالعان. ولاردىڭ جاعدايى تۇراقتى ەكەنى ايتىلدى. ازىرگە جاراقات العان-الماعانى ناقتىلانباعان. اقش اسكەري-تەڭىز كۇشتەرى وكىلدەرىنىڭ مالىمەتىنشە، ەكيپاج مۇشەلەرى مەديتسينالىق تەكسەرۋدەن ءوتىپ جاتىر.
اپاتقا ۇشىراعان EA-18G Growler ۇشاقتارى ۆاشينگتون شتاتىنداعى راديوەلەكتروندىق كۇرەس ەسكادريلياسىنىڭ قۇرامىندا بولعان. اقش اتك دەرەگىنشە، ءبىر ۇشاقتىڭ قۇنى شامامەن 67 ميلليون دوللاردى قۇرايدى. اتالمىش اۆياشوۋ سوڭعى رەت 2018 جىلى وتكەن. سول كەزدە دە اپات بولىپ، ۇشقىش قازا تاپقان ەدى.
