بالاعا ءوز الەۋەتىن اشۋعا قالاي كومەكتەسۋگە بولادى.
نازاردىڭ جەتىسپەۋشىلىگى جانە گيپەراكتيۆتىلىك سيندرومى – ءالى كۇنگە دەيىن كوپتەگەن تۇسىنبەۋشىلىك پەن ستەرەوتيپتەرگە تولى تاقىرىپ. الايدا مامانداردىڭ پىكىرىنشە، بۇل جاعدايعا دەگەن كوزقاراستى تۇبەگەيلى وزگەرتۋ وتە ماڭىزدى.
«وركەن» بااۇعپي پسيحولوگى سوفيا باشكاەۆا اتاپ كورسەتەدى: ءوزىڭىزدى نەمەسە بالاڭىزدى سدۆگ ءۇشىن كىنالاۋ – ماسەلەنى شەشۋدىڭ جولى ەمەس، كەرىسىنشە، جاعدايدى ۋشىقتىرۋى مۇمكىن. بۇل سيندروممەن ءومىر سۇرەتىن بالا ءوزىنىڭ ەرەكشەلىگى ءۇشىن كىنالى ەمەس. ءبىز بالانى شاشىنىڭ نەمەسە كوزىنىڭ ءتۇسى ءۇشىن، نە شىعارماشىلىق قابىلەتى ءۇشىن كىنالامايمىز عوي.
نازاردىڭ جەتىسپەۋشىلىگى جانە گيپەراكتيۆتىلىك سيندرومى دەگەنىمىز نە؟
نازاردىڭ جەتىسپەۋشىلىگى جانە گيپەراكتيۆتىلىك سيندرومى – بۇل جۇيكە جۇيەسى مەن پسيحيكانىڭ ەرەكشەلىگى، ول ادامدى سىرتقى تىتىركەندىرگىشتەر مەن ىشكى يمپۋلستەرگە اسا سەزىمتال ەتەدى. بۇل ۇكىم ەمەس، بالانىڭ وسى ەرەكشەلىگىنە نازار اۋدارىپ، وعان تۋىندايتىن قيىندىقتارمەن كۇرەسۋگە كومەكتەسۋ قاجەتتىگىنىڭ بەلگىسى»، – دەپ تۇسىندىرەدى «وركەن» بااۇعپي پسيحولوگى سوفيا باشكاەۆا.
نجگس تۇسىنىستىك پەن قولداۋدى قاجەت ەتەدى، ال ايىپتاۋ – ورىنسىز. بەلگىلەر مەن سيمپتومداردى ەلەمەۋ جاعدايدى ودان ءارى قيىنداتا ءتۇسۋى مۇمكىن.
قولداۋ بولماعان جاعدايدا تۋىندايتىن قاۋىپتەر
ەگەر بالا قاجەتتى قولداۋعا يە بولماسا، ونىڭ قيىندىقتارى ەرەسەك ومىرگە دەيىن دە جالعاسۋى مۇمكىن:
- قاتتى مازاسىزدىق.
- ءتارتىپسىز، بەيبەرەكەت ءومىر سالتى.
- مەرزىمدەردى ساقتاۋ مەن جۇمىس ورنىنداعى ءوزىن-ءوزى ۇيىمداستىرۋدا قيىندىقتار.
پسيحولوگتىڭ ايتۋىنشا، بۇل جاي عانا مىنەزدىڭ السىزدىگى ەمەس، بۇل – مامانداردىڭ، اتاپ ايتقاندا پسيحولوگتەر مەن پسيحوتەراپەۆتەردىڭ قولداۋىن قاجەت ەتەتىن كۇردەلى ماسەلە.
نجگس – رەسۋرس رەتىندە: شىعارماشىلىق پەن دارىندىلىق
جاعىمدى جاعىن دا ۇمىتپاۋ ماڭىزدى: نجگس بار بالالار كوبىنەسە ايقىن شىعارماشىلىق قابىلەتتەرگە جانە ەرەكشە دارىندىلىققا يە.
ويلاۋ ەرەكشەلىگى مەن سەزىمتالدىعى جوعارى بالالاردىڭ الەۋەتى زور. ەگەر ولاردىڭ كۇش-قۋاتى مەن نازارىن دۇرىس ارناعا باعىتتاسا، بۇل قاسيەتتەر ۇلكەن جەتىستىككە جەتەلەيتىن قۇندى رەسۋرسقا اينالادى.
اتا-انالارعا ارنالعان ارەكەت الگوريتمى
- بالادا نجگس بولسا نە ىستەۋ كەرەك؟
- جاعدايدى قابىلداۋ. ايىپتاماۋ، كەرىسىنشە تۇسىنۋگە تىرىسۋ.
- قولداۋ مەن كومەكتى قامتاماسىز ەتۋ. بۇل بالاعا ءوزىن-ءوزى رەتتەۋ جانە نازارىن باسقارۋ داعدىلارىن دامىتۋعا كومەكتەسەدى.
- ماماندارعا جۇگىنۋ. پسيحولوگ نەمەسە پسيحوتەراپەۆتپەن جەكە ستراتەگيانى ازىرلەۋ ءۇشىن كەڭەسۋ قاجەت.
«ەگەر ءسىز نجگس-مەن بەتپە-بەت كەلسەڭىز، مۇنىمەن ءومىر بىتپەيدى، كەرىسىنشە، ەرەكشە قامقورلىق پەن شىدامدىلىقتى قاجەت ەتەتىن جەكە ساپاردىڭ باستالۋى ەكەنىن ۇمىتپاڭىز. بالاڭىز ءوزىن قابىلدانعان، باعالانعان جانە ۇلكەن مۇمكىندىكتەرگە يە ەكەنىن سەزىنۋى ءۇشىن كومەكتەسىڭىز»، – دەپ قورىتىندىلايدى سوفيا باشكاەۆا.
بالا قيىندىقتارمەن كۇرەسۋدى ۇيرەنگەن كەزدە، ول جاي عانا بەيىمدەلىپ قويماي، ءوزىنىڭ بىرەگەي قابىلەتتەرىن اشا باستايدى.
