قازاقستاندا قارجى الاياقتارىنىڭ قۇربانى بولعان ازاماتتاردىڭ نەسيەسىن بانكتەر ءوز ەسەبىنەن جاباتىن بولادى. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا ايتتى، دەپ حابارلايدى «ادىرنا» ءتىلشىسى.
ول 30 قىركۇيەكتەن باستاپ نەسيەنى سوت تارتىبىمەن ەسەپتەن شىعارۋ جونىندەگى جاڭا نورما كۇشىنە ەنگەنىن مالىمدەدى. ايتۋىنشا، بۇل شارا الاياقتىق قۇربانى بولعان ازاماتتاردىڭ قۇقىقتارىن قورعاۋعا باعىتتالعان.
«ەگەر نەسيە ازاماتتىڭ كەلىسىمىنسىز راسىمدەلىپ، ول بيومەتريالىق تەكسەرۋدەن وتپەگەن بولسا، وندا بەرەشەك سوتقا جۇگىنبەي-اق ەسەپتەن شىعارىلادى. ول ءۇشىن قۇقىق قورعاۋ ورگاندارىنا ارىز بەرۋ قاجەت. تەرگەۋ ورگاندارى نەسيە الاياقتىق جولمەن الىنعانى جونىندە قاۋلى شىعارادى، سول قۇجاتتىڭ نەگىزىندە بانك قارىزدى جويا الادى»، – دەدى ءمادينا ابىلقاسىموۆا.
قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە، سوڭعى ەكى جىلدا بانكتەر 1 400 ازاماتتىڭ 1,9 ميلليارد تەڭگە كولەمىندەگى نەسيەسىن كەشىرگەن. مۇنىڭ ءبارى ازاماتتاردىڭ ءوتىنىشى مەن قۇقىق قورعاۋ ورگاندارىنىڭ قاۋلىلارى نەگىزىندە سوتقا جۇگىنبەي-اق شەشىلگەن.
