34 جاستاعى زوحران مامداني نيۋ-يورك قالاسىنىڭ مەرىن سايلاۋدا جەڭىسكە جەتتى. وسىلايشا ول بۇل لاۋازىمعا تاعايىندالعان تۇڭعىش مۇسىلمان جانە ەڭ جاس قالا باسشىسى اتاندى، دەپ حابارلايدى «ادىرنا» ءتىلشىسى Associated Press باسىلىمىنا سىلتەمە جاساپ.
داۋىس بەرۋ ناتيجەسى بويىنشا مامداني 50,5 پايىز داۋىس جينادى. ەكىنشى ورىنعا نيۋ-يورك شتاتىنىڭ بۇرىنعى گۋبەرناتورى، دەموكرات ەندريۋ كۋومو تابان تىرەدى. ول 41,7 پايىز داۋىسقا يە بولدى. بۇعان دەيىن دەكوكراتتى اقش پرەزيدەنتى دونالد ترامپ قولداۋعا شاقىرعان ەدى. ال رەسپۋبليكالىق پارتيا وكىلى كەرتيس سليۆا 7,2 پايىز داۋىس جينادى.
مامداني سايلاۋ ناتيجەسىن «ساياسي اۋلەتتىڭ قۇلاۋى» دەپ اتادى.
ء«بىز جاڭارعان قالانىڭ اۋاسىمەن تىنىستاپ وتىرمىز»، – دەدى ول.
ەسكە سالايىق، بۇعان دەيىن اق ءۇي باسشىسى دونالد ترامپ زوحران مامداني مەر بولعان جاعدايدا نيۋ-يورك قالاسىن قارجىلاندىرۋدى قىسقارتاتىنىن ايتقان ەدى.
زوحران مامداني 1991 جىلى ۋگاندا استاناسى كامپالادا دۇنيەگە كەلگەن. ونىڭ اناسى — ايگىلى ءۇندى رەجيسسەر ميرا ناير, ال اكەسى — ۋگاندالىق عالىم، ءۇندى تەكتەس ساياساتتانۋشى ماحمۋد مامداني. بولاشاق مەر بەس جاسىندا وتباسىمەن وڭتۇستىك افريكاعا, ال ەكى جىلدان كەيىن نيۋ-يورككە كوشىپ كەلگەن. اقش ازاماتتىعىن 2018 جىلى العان.
