Qazaqstanda 50 myŋnan astam jük kölıgınıŋ jürgızuşısı jūmyssyz qaldy, dep habarlaidy «Adyrna» ūlttyq portaly Zakon.kz-ke sılteme jasap.
Jürgızuşıler kölık prokuraturasyna ūjymdyq aryz jazǧan. «KTK» telearnasynyŋ mälımetınşe, ötken aptada bırden 200-ge juyq tasymaldauşy kompaniianyŋ qyzmetı toqtatylǧan. Olardy jalǧan qūjat paidalanǧan dep aiyptaǧan.
Mäselenıŋ tuyndauyna biyl qaŋtar aiynan bastap jük kölıkterıne şetelge şyǧuǧa arnalǧan vizalardyŋ berılmeuı sebep bolǧan. Osydan keiın keibır tasymaldauşylar rūqsat qūjattaryn zaŋsyz jolmen satyp aluǧa mäjbür bolǧan.
Jürgızuşılerdıŋ aituynşa, şetelge şyǧu üşın ärbır jük kölıgıne arnaiy rūqsat qaǧazy — viza qajet. Onyŋ qūny şamamen 4 myŋ teŋge. Būl qūjattardy Kölık ministrlıgı beredı. Alaida biyldan bastap jüie tolyq avtomattandyrylyp, tek onlain formatqa köşken. Nätijesınde qūjat alu kürdelenıp, keibır jürgızuşıler qara naryqtan 100 myŋ teŋgege deiın töleuge mäjbür bolǧan.
Jük tasymaldauşylardyŋ aituynşa, eger mäsele şeşılmese, elde azyq-tülık pen tūrmystyq tauarlardyŋ baǧasy kürt ösuı mümkın.
Kölık ministrlıgı būl jaǧdaiǧa bailanysty tüsınıkteme berıp, alaŋdauǧa negız joq ekenın mälımdedı. Vedomstvonyŋ mälımetınşe, qūjat beru tärtıbın küşeitu — deldaldar men zaŋsyz deldaldyqty joiu maqsatynda qabyldanǧan şara.
«Kompaniia rūqsat ala almasa, būl jüie onyŋ būzuşylyǧyn anyqtaǧanyn bıldıredı. Degenmen mūndai kompaniialar jūmysyn jalǧastyra alady. Mysaly, Qytai, Özbekstan jäne EAEO elderıne jükterın jetkızuge tyiym salynǧan joq. Būl baǧyttarǧa arnaiy İBR-blank qajet emes», — dedı kölık jäne kölık baqylauy komitetı basqarmasynyŋ basşysy Ǧani Salmaev.
Onyŋ aituynşa, eger kompaniialar nemese jürgızuşıler özderıne qatysty ädıletsız şeşım dep eseptese, komitetke resmi hat joldap, jeke qarastyrudy sūrai alady.
