مۇحتار اۋەزوۆ اتىنداعى كىتاپحانادا "كىتاپتار الەمى" جوباسىنىڭ بەس جىلدىق مەرەيتويى اياسىندا جازۋشى سالتانات ابدىعاليدىڭ "جانازىق" جانە "كىشكەنتاي ايەل" كىتاپتارىنىڭ تانىستىرىلىمى ءوتتى. شارانى قازاقستاننىڭ ەڭبەك سىڭىرگەن قايراتكەرى، م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى، جازۋشى نۇرداۋلەت اقىش جۇرگىزدى.
العاشقى بولىپ ءسوز سويلەگەن قازاقستان جازۋشىلار وداعى باسقارما توراعاسىنىڭ ورىنباسارى، قازاقستاننىڭ ەڭبەك سىڭىرگەن قايراتكەرى، اقىن قاسىمحان بەگمانوۆ جاس جازۋشىنىڭ اياق الىسى – قوس كىتابى قوماقتى ەڭبەك ەكەنىنە توقتالىپ، اقجارما تىلەگىن ءبىلدىردى. ال ارنايى تاراز قالاسىنان ات تەرلەتىپ كەلگەن قازاقستاننىڭ ەڭبەك سىڭىرگەن قايراتكەرى، حالىقارالىق "الاش" ادەبي سىيلىعىنىڭ لاۋرەاتى، جازۋشى كوسەمالى ءساتتىبايۇلى مەن «شالقار» راديوسىنىڭ ديرەكتورى، حالىقارالىق "الاش" ادەبي سىيلىعىنىڭ لاۋرەاتى، جازۋشى بولاتبەك تولەپبەرگەن "كىتاپتار الەمى" جوباسىنىڭ ماڭىزدىلىعىنا توقتالىپ، جەتەكشىسى سالتانات ابدىعاليدىڭ "جانازىق" جانە "كىشكەنتاي ايەل" كىتاپتارىنىڭ كوتەرەر جۇگى سالماقتى ەكەنىن ايتتى.
قازاقستاننىڭ ەڭبەك سىڭىرگەن قايراتكەرى، ءداستۇرلى ءانشى ارداق يساتاەۆا ءوز شاكىرتتەرىمەن انمەن شاشۋ شاشىپ، شارانىڭ كورىگىن قىزدىرا ءتۇستى. جيىنعا سونداي-اق سالتانات ابدىعالي جەتەكشىلىك ەتەتىن "كىتاپ جاناشىرلارى" كلۋبىنىڭ ەلدەگى جانە شەت ەلدەگى مۇشەلەرى دە قاتىستى. تۇركىستان وبلىسى، سوزاق اۋدانىنان كەلگەن اقىن ءارى ۇستاز تۇمارتاي ءدىنتايۇلى، اقىن نەسىبەلى شايدازىموۆا، موڭعوليا ەلىنىڭ بايان-ولگەي ولكەسىنەن كەلگەن تولەگەن بايانحانۇلى، شىمكەنت قالاسىنان كەلگەن رۇستەم كەنجەۇلى، تۇركىستان قالاسىنان كەلگەن قالامگەر جىبەك يسكاكوۆالار "كىتاپتار الەمىندە" جوباسىنىڭ بەس جىلدىق شاراسىن ۇيىمداستىرعان كلۋب جەتەكشىسى سالتانات امانگەلدىقىزىنا شىعارماشىلىق تابىس تىلەپ، بارشا كلۋب مۇشەلەرى اتىنان ريزاشىلىقتارىن ءبىلدىردى.
جاس جازۋشى سالتانات ابدىعاليدىڭ "كىشكەنتاي ايەل" اتتى پروزالىق كىتابىنا بۇگىنگى كۇننىڭ ەڭ كوكەيتەستى ماسەلەلەرىن وزەك ەتكەن "اتا ءيىسى", "اكەگە حات", "جالعىزدىڭ مۇڭى", "كىشكەنتاي ايەل", "باقىتگۇلدىڭ ءبىر كۇنى" ىسپەتتى تۋىندىلارى ەنگەن. جيناقتاعى تاعدىردىڭ تاۋقىمەتىن جالعىز تارتقان ايەلدەردىڭ، اكەگە دەگەن ساعىنىشتارى جۇرەكتەرىن سىزداتقان بالالاردىڭ بەينەسى شىنايى سۋرەتتەلگەن.
بارشانىڭ نازارىن كىتاپقا اۋدارىپ، ۇلكەن يگىلىكتى ىسپەن اينالىسىپ كەلە جاتقان سالتانات ابدىعاليدىڭ «كىتاپتار الەمى» جوباسىنا بەس جىل تولۋىنا وراي «جانازىق» كىتابى جارىق كورگەن. وسى جوبا اياسىندا ومىرگە كەلگەن «كىتاپ جاناشىرلارى» كلۋبىنىڭ وقىرمانداردى كوبەيتۋ جولىنداعى سان قىرلى ىزدەنىستەرى كوڭىلگە قۋانىش ۇيالاتىپ، بولاشاققا دەگەن ءۇمىتتى وياتادى.
وسى ۋاقىتتىڭ ىشىندە كىتاپ سۇيەر قاۋىم ەرەكشە ىقىلاسپەن قاتىسقان وقىرماندار اراسىندا "بىرگە كىتاپ وقيىق!" ونلاين بايگەسىنە، "جارىسا كىتاپ وقيىق!" بايقاۋىنا جانە "اسەرلى اڭگىمە" ونلاين بايقاۋىمەن قاتار، مەكتەپ جاسىنداعى بالالار اراسىنداعى "بىرگە كىتاپ وقيىق" ونلاين بايگەسىنە ەلىمىزدىڭ بارلىق ايماقتارىنان جاسوسپىرىمدەردىڭ ەرەكشە ىنتا-ىقىلاسپەن قاتىسقاندىعى قۋانتادى. وقىرمان ىقىلاسىن ءساتتى پايدالانعان سالتانات ابدىعالي «كىتاپ جاناشىرلارى» كلۋبىن قۇرىپ، قاتارىنا قالىڭ ءنوپىر مۇشەلەرىن جيناعان. وندا ءتۇرلى ماماندىق يەلەرى: قالامگەر دە، كاسىپكەر دە، ۇستاز دا، قۇرىلىسشى دا، شاشتارازشى دا ت.ب. بار. بۇل توپتى جەتەكشىسى سالتانات ابدىعالي ارنايى قۇرىلعان الەۋمەتتىك جەلىلەرى ارقىلى ءتۇرلى شارالار ۇيىمداستىرا وتىرىپ، قىزىقتى ەتىپ جۇرگىزىپ كەلەدى.
قوعامدى كىتاپ وقۋعا ۇندەپ كەلە جاتقان سالتانات ابدىعالي الەۋمەتتىك جەلىنىڭ مۇمكىندىگىن قازاق كىتابىن ناسيحاتتاۋدىڭ جاقسى ءبىر قۇرالىنا اينالدىرعان «كىتاپتار الەمى» جوباسىنىڭ جۇمىستارى «جانازىق» كىتابىنا وزەك بولعان. الەۋمەتتىك جەلىلەرىندەگى پاراقشالارىندا بىردە ولەڭ مەن اڭگىمە وقىپ، بىردە اقىن-جازۋشىلارمەن پودكاست ءتۇسىرىپ، سۇحباتىن جاريالاعان، بىردە ماقال-ماتەل، جۇمباق ت.ب. جاسىرىپ، قارا ءۇزىپ، ۇزدىك شىققاندارىنا اقشالاي سىيلىقتار مەن كىتاپتار تاراتقان جوبا جۇمىسى «جانازىق» جيناعىنىڭ وقىرماندارىنا قىزعىلىقتى بولماق.
