رەسەي سىرتقى ىستەر ءمينيسترى سەرگەي لاۆروۆ باتىستىڭ ماسكەۋگە «تولىق گيبريدتىك سوعىس» جاريالاعانىن ايتتى، دەپ حابارلايدى “ادىرنا” ۇلتتىق پورتالى.
«ۇجىمدىق باتىس بىزگە توتال، گيبريدتى سوعىس جاريالادى جانە مۇنىڭ ءبارى قانشا ۋاقىتقا سوزىلاتىنىن بولجاۋ قيىن. بىراق ونىڭ سالدارى بارلىعىنا بىردەي اسەر ەتەتىنى انىق»، - دەدى لاۆروۆ ماسكەۋدە كرەملگە ادال رەسەيلىك ساياساتتانۋشىلار مەن سىرتقى ساياسات ساراپشىلارى كىرەتىن سىرتقى جانە قورعانىس ساياساتى جونىندەگى كەڭەستىڭ وتىرىسىندا.
لاۆروۆ رەسەيدىڭ ۋكرايناعا باسىپ كىرۋىنەن كەيىنگى باتىستىڭ ارەكەتىن «ۇڭگىردەگى رۋسسوفوبيالىق جارىلىس» دەپ اتادى. باتىستاعى رەسەيلىك اكتيۆتەرگە قاتىستى «ورىسشانىڭ ءبارىن جويۋ مادەنيەتى» مەن «مەملەكەتتىك قاراقشىلىق» تۋرالى ايتتى.
سەنبى كۇنى G7 سىرتقى ىستەر مينيسترلەرى رەسەيدىڭ ەكونوميكالىق جانە ساياسي وقشاۋلانۋىن كۇشەيتۋگە، ۋكرايناعا قارۋ-جاراق جەتكىزۋدى جالعاستىرۋعا جانە سوعىستان تۋىنداعان جاھاندىق ازىق-تۇلىك تاپشىلىعىن ازايتۋعا كۇش سالۋعا ۋادە بەردى.
سونىمەن قاتار، G7 سىرتقى ىستەر مينيسترلەرى قىتايدى ۋكراينامەن قاقتىعىستا ماسكەۋدى قولداۋدان باس تارتۋعا شاقىرىپ، باسقا نارسەلەرمەن قاتار، رەسەيدىڭ ارەكەتتەرى جانجال ايماعىنان تىس كوپتەگەن ەلگە اسەر ەتۋى مۇمكىن اۋقىمدى ازىق-تۇلىك جانە ەنەرگەتيكالىق داعدارىستى تۋدىراتىنىن اتاپ ءوتتى.
“ادىرنا” ۇلتتىق پورتالى
