قازاقستاندا پويىز بيلەتتەرىن ساتۋ ءتارتىبى وزگەرۋى ىقتيمال. جاڭا جۇيە ەنگىزىلگەن جاعدايدا ءبىر كۋپەگە تەك ەر ادامدار نەمەسە تەك ايەلدەر بيلەت ساتىپ الا الادى. بۇل ۇسىنىستى Threads الەۋمەتتىك جەلىسىندەگى قازاقستاندىق قولدانۋشى كوتەردى.
ونىڭ ايتۋىنشا، تۇركيادا ءبىر كۋپەدەگى ورىندار ەرلەر مەن ايەلدەرگە ارالاس ساتىلمايدى.
«ەگەر كۋپەدەگى ورىندى ءبىرىنشى بولىپ ەر ادام ساتىپ السا، كەيىن سول كۋپەگە تەك ەر ادامدار عانا بيلەت الا الادى. ال العاشقى ورىندى ايەل ادام تاڭداسا، قالعان ورىندار ايەلدەرگە عانا ۇسىنىلادى. نەلىكتەن مۇنداي جۇيەنى قازاقستاندا دا ەنگىزبەسكە؟» — دەپ جازدى قولدانۋشى.
جازباعا «قازاقستان تەمىر جولى» ۇك» اق وكىلدەرى جاۋاپ بەردى. كومپانيا بۇل ۇسىنىس قازىرگى ۋاقىتتا ماماندار تاراپىنان زەرتتەلىپ جاتقانىن حابارلادى.
«بۇل جۇيەنى قازىر ماماندارىمىز زەرتتەپ جاتىر. كەيىن ونى ەنگىزۋ ماسەلەسى قاراستىرىلادى»، – دەلىنگەن قتج جاۋابىندا.
سونىمەن قاتار كومپانيا قازاقستاندا ايەل جولاۋشىلارعا ارنالعان قىزمەتتىڭ قازىردىڭ وزىندە بار ەكەنىن اتاپ ءوتتى. ۇلتتىق تاسىمالداۋشى نەگىزگى باعىتتاردا «ايەلدەر ۆاگونى» قىزمەتىن ىسكە قوسقان.
وسىلايشا، بولاشاقتا پويىز كۋپەلەرىندە جولاۋشىلاردى جىنىسىنا قاراي بولەك ورنالاستىرۋ جۇيەسى ەنگىزىلۋى مۇمكىن. الايدا ازىرگە بۇل تەك ۇسىنىس رەتىندە قاراستىرىلىپ جاتىر، ناقتى شەشىم قابىلدانعان جوق.
