24 قىركۇيەك كۇنى داللاستا اقش-تىڭ يمميگراتسيا جانە كەدەن قىزمەتىنىڭ (ICE) وڭىرلىك كەڭسەسىنە شابۋىل جاسالدى، دەپ حابارلايدى «ادىرنا» ءتىلشىسى.
ەلدىڭ ىشكى قاۋىپسىزدىك مينيسترلىگىنىڭ مالىمدەۋىنشە، ەر ادام ءبىر تۇتقىندى اتىپ ءولتىرىپ، ەكەۋىن جارالاعاننان كەيىن ءوزىن-ءوزى اتىپ تاستاعان. باستاپقىدا پوليتسيا ەكى ادامنىڭ قازا تاپقانىن حابارلاعان بولاتىن.
مينيسترلىكتىڭ دەرەگىنشە، شابۋىلشى كورشىلەس عيماراتتىڭ شاتىرىنان وق اتقان. فبر باسشىسى كەش پاتەل الەۋمەتتىك جەلىدە قىلمىسكەردەن تابىلعان وق-دارىلەردىڭ سۋرەتىن جاريالادى. ونىڭ بىرىندە «ANTI–ICE» دەگەن جازۋ بولعان.
«تەرگەۋ جالعاسىپ جاتىر، الايدا العاشقى ايعاقتار بۇل قىلمىستىڭ ارتىندا يدەولوگيالىق سەبەپ بار ەكەنىن كورسەتەدى»، — دەدى پاتەل.
اقش پرەزيدەنتى دونالد ترامپ تا Truth Social جەلىسىندە پىكىر ءبىلدىرىپ، مۇنداي قىلمىستارعا «سولشىل راديكالداردى» ايىپتادى.
«بەلگىلى بولعانداي، وق اتۋشى پاتروندارعا «Anti-ICE» دەپ جازعان. بۇل — جيىركەنىشتى! ICE-ءتىڭ باتىل ەرلەرى مەن ايەلدەرى تەك ءوز جۇمىسىن اتقارىپ، ەلدەن ەڭ قاۋىپتىلەردى شىعارىپ جىبەرۋگە تىرىسىپ ءجۇر. بىراق ولار سولشىل راديكالداردىڭ تاراپىنان بۇرىن-سوڭدى بولماعان قاۋىپ-قاتەرگە، زورلىق-زومبىلىق پەن شابۋىلدارعا تاپ بولىپ وتىر»، — دەپ جازدى ترامپ.
پرەزيدەنت سونداي-اق انتيفا قوزعالىسىن تەرروريستىك ۇيىم دەپ جاريالاعانىن ەسكە سالىپ، وسى اپتادا اقش-تاعى «بارلىق تەرروريستىك جەلىنى جويۋ تۋرالى» جارلىققا قول قوياتىنىن ايتتى.
پوليتسياعا داللاس قالاسىنىڭ سولتۇستىك-باتىسىنداعى كەڭسەدە اتىس بولعانى تۋرالى حابار تاڭعى 6:40 شاماسىندا تۇسكەن. شابۋىلشى كورشى عيماراتتىڭ شاتىرىنان ءولى كۇيىندە تابىلعان.
بۇل شابۋىل — بيىل تەحاستا ىشكى قاۋىپسىزدىك مينيسترلىگىنە قاراستى نىساندا تىركەلگەن ءۇشىنشى وقيعا. شىلدەدە پرەريلەندەگى ICE قاماۋ ورتالىعىندا ءبىر پوليتسەي وققا ۇشقان ەدى. ودان بولەك، 27 جاستاعى تۇرعىن اقش شەكارا قىزمەتىنىڭ ماك-اللەندەگى بەكەتىنە وق جاۋدىرعان.
