قىتايدىڭ تانىمال Hunan TV تەلەارناسى قازاقستاننىڭ ەڭ كورىكتى تۋريستىك ورىندارىندا تۇسىرىلگەن بەينەنى كورسەتتى، دەپ حابارلايدى “ادىرنا” ۇلتتىق پورتالى.
“Voice Beyond Horizon” اتتى جاڭا تەلەجوبانىڭ بەينەروليگى قازاقستاندا تۇسىرىلگەن. وندا ەلدىڭ باي تابيعي جانە مادەني مۇراسىن تانىستىرىپ، تۋريستىك الەۋەتىن ميلليونداعان كورەرمەنگە كورسەتۋ كوزدەلگەن.
جوبا ديماش قۇدايبەرگەننىڭ باستاماسىمەن جانە Hunan Broadcasting System تەلەارناسىمەن بىرلەسىپ جۇزەگە استى.
2025 جىلدىڭ قىركۇيەگىندە ءتۇسىرىلىم توبى مەن قاتىسۋشىلار قازاقستاننىڭ وڭىرلەرىن ارالاپ، 7436 شاقىرىمنان استام جول ءجۇرىپ ءوتتى. 22 كۇندىك ساپار بارىسىندا ولار ەلىمىزدىڭ تابيعي جانە مادەني ەسكەرتكىشتەرىمەن تانىسقان.
تۇسىرىلىمگە قازاقستان، قىتاي، قىرعىزستان، يتاليا، مالايزيا جانە سەربيا ەلدەرىنىڭ تانىمال ارتىستەرى قاتىستى.
جوبا بارىسىندا ۇلى جىبەك جولىنىڭ بويىنداعى تۇركىستان، ماڭعىستاۋداعى بوزجىرا مەن كاسپي جاعالاۋى، الماتى ءوڭىرىنىڭ قايىڭدى كولى، ساتى اۋىلى، قاپشاعاي سۋ قويماسى، اقمولا وبلىسىنداعى كوبەيتۇز كولى مەن بۋراباي سىندى بىرەگەي تابيعي لوكاتسيالار قامتىلدى.
“Voice Beyond Horizon” جوباسى 2026 جىلى Hunan TV تەلەارناسىندا كورسەتىلەدى.
جوبانى جۇزەگە اسىرۋعا Kazakh Tourism ۇلتتىق كومپانياسى، تۋريزم جانە سپورت مينيسترلىگى، “جولاۋشىلار تاسىمالى” اق جانە وڭىرلىك اكىمدىكتەر قولداۋ كورسەتكەن.
