ۋكراينا تاراپىنىڭ باستاماسىمەن قازاقستان پرەزيدەنتى قاسىم-جومارت توقاەۆ پەن ۋكراينا پرەزيدەنتى ۆلاديمير زەلەنسكي تەلەفون ارقىلى سويلەستى، دەپ حابارلايدى "ادىرنا" ۇلتتىق پورتالى.
اڭگىمە بارىسىندا قاسىم-جومارت توقاەۆ قازاق حالقىنىڭ ۋكراين حالقىنا، ونىڭ تاريحىنا، مادەنيەتىنە جانە تىلىنە ەرەكشە قۇرمەتپەن قارايتىنىن ايتتى. ول قازاقستاننىڭ ۋكراينادا حالىقارالىق قۇقىق قاعيداتتارى نەگىزىندە بەيبىتشىلىكتىڭ ورناۋىنا مۇددەلى ەكەنىن جەتكىزدى.
پرەزيدەنت استانانىڭ اۋەلدەن-اق ادىلدىككە نەگىزدەلگەن بەيبىتشىلىك فورمۋلاسىن بىرلەسىپ ىزدەۋ يدەياسىن قولداعانىن جانە بۇل تۇرعىدا بۇۇ جارعىسىن، مەملەكەتتەردىڭ ەگەمەندىگى مەن اۋماقتىق تۇتاستىعىن ساقتاۋ قاعيداتىن ۇستانىپ كەلە جاتقانىن ەسكە سالدى.
مەملەكەت باسشىسىنىڭ پىكىرىنشە، قازىرگى كۇردەلى جاعدايدا ۋكراينا مەملەكەتتىلىگىن ساقتاۋ مەن قورعاۋدى قامتاماسىز ەتە وتىرىپ، قاقتىعىستى بايىپپەن شەشۋ ماڭىزدى. ول تاراپتاردى «جانجالدان، جامان بولسا دا ءبىتىم ارتىق» دەگەن دانالىققا ساي ارەكەت ەتۋگە شاقىردى.
قاسىم-جومارت توقاەۆ تەرريتوريالىق ماسەلەلەردىڭ حالىقارالىق قاتىناستارداعى ەڭ كۇردەلى تۇيتكىلدەردىڭ ءبىرى ەكەنىن اتاپ ءوتتى. مۇنداي تۇيتكىلدەر كوبىنە بەيبىت كەلىسىمدەر جولىندا باستى كەدەرگىگە اينالاتىنىن، بىراق قازىرگى ەڭ باستى مىندەت – حالىقارالىق كەپىلدىكتەر ارقىلى ۋكراينا قاۋىپسىزدىگىن قامتاماسىز ەتىپ، مەملەكەتتىلىگىن ساقتاۋ ەكەنىن ايتتى.
سونداي-اق، قازاقستان پرەزيدەنتى ەكى ەلدىڭ ءوزارا مۇددەلەرىنە ساي ءتۇرلى سالادا بەلسەندى ىنتىماقتاستىق ورناتۋعا دايىن ەكەنىن جەتكىزدى.
