قازاقستاننىڭ ازاماتتىق قوعام وكىلدەرى پولشادا "تىڭشىلىق جاسادى" دەگەن كۇدىكپەن ۇستالعان قازاقستاندىق اسكەري اتتاشەنىڭ كومەكشىسى ءانۋار باكىبايدىڭ ىسىنە بايلانىستى ەۋروپالىق وداق پەن ەۋروپا كەڭەسىنىڭ پارلامەنتتىك اسسامبلەياسىنا ۇندەۋ جاسادى، دەپ حابارلايدى «ادىرنا» ءتىلشىسى.
«بۇل ۇستالۋ فاكتىسى ءبىزدىڭ بىرنەشە جىل بويى ايتىپ كەلە جاتقان پىكىرىمىزدى ايقىن دالەلدەپ وتىر. قازاقستاننىڭ ارنايى قىزمەتتەرى كرەملگە تاۋەلدى جانە كوبىنە رەسەي قۇرىلىمدارىنىڭ، سونىڭ ىشىندە بارلاۋ مەن گيبريدتىك وپەراتسيالاردىڭ مۇددەسىندە ارەكەت ەتەدى.
ءانۋار باكىباي — جاي عانا ديپلومات ەمەس، ول قازاقستان قورعانىس مينيسترلىگىنىڭ اسكەري جوعارى وقۋ ورنىن تامامداعان، ۋكراينادا اككرەديتتەلگەن وفيتسەر. ونىڭ پولشا بيلىگى تاراپىنان ناتو-نىڭ اسكەري نىساندارى جونىندە اقپارات جينادى دەگەن ايىپپەن ۇستالعانى ەۋروپاعا قازاقستان ەۋروپانىڭ مۇددەلەرىنە قارسى باعىتتالعان قىزمەتكە تارتىلعانى جايلى بۇلتارتپاس دالەل بەرەدى»،—دەلىنگەن حابارلامادا.
سونداي-اق ۇندەۋدە ەل ىشىندەگى احۋالعا دا نازار اۋدارىلعان.
«بيلىك پىكىر الۋاندىعىن باسىپ-جانشۋ ساياساتىن جالعاستىرىپ وتىر. جۋرناليستەر، قۇقىق قورعاۋشىلار مەن ازاماتتىق بەلسەندىلەر قىلمىستىق قۋدالاۋعا، ازاپتاۋعا، ادىلەتسىز سوت ۇكىمدەرىنە ۇشىراۋدا. سوتتار جابىق كۇيدە قالىپ، ونداعان ساياسي تۇتقىن تەمىر توردىڭ ار جاعىندا وتىر. اقوردا كرەملدىڭ ادىستەرىن قايتالاۋدا»،—دەيدى بەلسەندىلەر.
ازاماتتىق قوعام وكىلدەرى ەۋروپالىق وداق پەن پاسە-ءنى باكىباي ءىسى بويىنشا كومەك كورسەتپەۋگە شاقىردى.
ء«بىزدىڭ پىكىرىمىزشە، باكىباي ىسىنە بايلانىستى كەز كەلگەن حالىقارالىق قولداۋ قازاقستانداعى ساياسي تۇتقىنداردى، اتاپ ايتساق، مارات جىلانباەۆ، دۋمان مۇحاممەتكارىم، ايگەرىم تلەۋجانوۆا، اسلان وتەپوۆ، ەرجان ەلشىباەۆ، ايدار سىزدىقوۆ، دانات نامازباەۆ، دانيار ادىلبەكوۆ، ماحامبەت ءابجان جانە قۇقىق قورعاۋ ۇيىمدارى تىزىمىنە ەنگىزىلگەن وزگە دە تۇتقىندارىن بوساتۋمەن تىكەلەي بايلانىستىرىلۋى ءتيىس»،—دەلىنگەن ۇندەۋدە.
اشىق جاريالانعان بۇل ۇندەۋگە قازاقستانداعى بەلگىلى قۇقىق قورعاۋشىلار، ادۆوكاتتار، جۋرناليستەر مەن قوعام بەلسەندىلەرى قول قويعان.
ەسكە سالايىق، تامىز ايىنىڭ باسىندا پولشا بيلىگى پوستكەڭەستىك ازيالىق ەلدەردىڭ بىرىنەن كەلگەن ديپلوماتتى ۇستاعانىن حابارلاعان ەدى. الايدا ناقتى قاي مەملەكەت ەكەنى سول كەزدە ناقتىلانبادى. كەيىننەن ونىڭ قازاقستان ديپلوماتى ەكەنى ايتىلدى. وعان پولشا مەن ونىڭ ناتو بويىنشا وداقتاستارىنا قارسى تىڭشىلىق جاسادى دەگەن كۇدىك كەلتىرىلۋدە.
