تۇركىستان وبلىسىندا الەۋمەتتىك ماڭىزى بار ازىق-تۇلىك باعاسى تۇراقتى باقىلاۋدا ۇستالىپ وتىر

تۇركىستان وبلىسىندا الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ باعىتىنداعى شارالار كۇشەيتىلگەن. وبلىس اكىمىنىڭ تاپسىرماسىنا سايكەس، باعانى نەگىزسىز وسىرۋگە جول بەرمەۋ، تۇرعىنداردى قولجەتىمدى ونىممەن قامتاماسىز ەتۋ ماقساتىندا مونيتورينگ پەن باقىلاۋ جۇمىستارى تۇراقتى جۇرگىزىلۋدە.

باعانى تۇراقتاندىرۋ ماقساتىندا اكىمدىكتىڭ تۇراقتاندىرۋ قورىندا جەتكىلىكتى كولەمدە 22 مىڭ توننا الەۋمەتتىك ماڭىزى بار ازىق-تۇلىك قورى قالىپتاستىرىلعان. الەۋمەتتىك ماڭىزى بار ازىق-تۇلىك تاۋارلارىن حالىققا قولجەتىمدى ەتۋ ماقساتىندا تۇركىستان وبلىسىندا 39 الەۋمەتتىك دۇكەن قىزمەت ەتەدى. بۇل دۇكەندەردە الەۋمەتتىك ماڭىزى بار ازىق-تۇلىك باعالارى نارىقتىق باعادان 15-20% تومەن ساۋدالانۋدا. 

سونىمەن قاتار ءار اپتا سايىن وبلىس اۋماعىندا جارمەڭكەلەر ۇيىمداستىرىلىپ، تىكەلەي اۋىل شارۋاشىلىعى تاۋارىن وندىرۋشىلەردىڭ قاتىسۋىمەن ونىمدەر نارىققا دەلدالسىز جەتكىزىلۋدە. ناتيجەسىندە، تۇتىنۋشىلار ازىق-تۇلىك تاۋارلارىن نارىقتىق باعادان 20-30% تومەن باعادا ساتىپ الۋدا.

اكىمدىك تاراپىنان ەت وندىرەتىن شارۋالارعا ارنايى قارجىلاي قولداۋ كورسەتۋ ارقىلى سيىر ەتىنىڭ باعاسى بازارلاردا 2 600 تەڭگەدەن ساۋدالانۋدا. وسىلايشا، سيىر ەتىنىڭ ەڭ تومەن باعاسى تۇركىستان وبلىسىندا قالىپتاسىپ وتىر. جالپى، ستاتيستيكالىق دەرەكتەرگە سايكەس، تۇركىستان قالاسىندا الەۋمەتتىك ماڭىزى بار تۇز، كۇنباعىس مايى، سيىر ەتى، سارى ماي، قانت، جۇمىرتقا جانە كوكونىس ونىمدەرىنىڭ باعاسى ەلىمىزدەگى ەڭ تومەن باعالار قاتارىندا.

ودان بولەك، «بەرەكە Fest» اكتسياسى باستالىپ، ساۋدا جەلىلەرىندە باعانىڭ ءوسۋىن تەجەۋ جانە تومەنتەدۋ ماقساتىندا ساۋدا ۇستەمەسى 10%-دان اسپاۋعا ءتيىس دەگەن شارتپەن مىندەتتى مەموراندۋمدار جاسالدى. اتالعان اكتسيا بارىسىندا قالا اۋماعىنداعى 14 سۋپەرماركەتپەن ارنايى مەموراندۋمدار ءتۇزىلدى.

قالاداعى ساۋدا جەلىلەرىندەگى باعا ۇستەمەسىن قاداعالاۋ ماقساتىندا جۇمىسشى توپتار تۇراقتى مونيتورينگ جۇمىستارىن جۇرگىزۋدە. ازىق-تۇلىك باعاسىن تۇراقتاندىرۋعا باعىتتالعان شارالار ودان ءارى جالعاساتىن بولادى.