تۇركىستان وبلىسى قارامۇرت اۋىلىنىڭ تۇرعىنى 14 جىل بىرگە تۇرعان جۇبايىن قىزعانىشتىڭ سالدارىنان بالعامەن ۇرىپ ولتىرگەن. كەيىن ەر ادام ءوز-وزىنە قول سالعانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
قاندى قىلمىستىڭ كۋاسى بولعان ەرلى-زايىپتىلاردىڭ ءتورت بالاسى تاڭەرتەڭ مەكتەپكە جينالىپ جاتقاندا اتا-اناسىنىڭ جانسىز دەنەسىن تاۋىپ العان. قازىر بالالار ۋاقىتشا قامقورلىققا الىنىپ، بالالار ۇيىنە تاپسىرىلدى.
مارقۇم ايەلدىڭ تۋىستارىنىڭ ايتۋىنشا، 45 جاستاعى كەلىنشەكتىڭ دەنەسى قاتتى سوققىدان ساۋ تامتىعى قالماعان. ال ەر ادام قىلمىس جاساعان سوڭ اۋديوجازبا قالدىرىپ، قىزعانىشتان وسىنداي قادامعا بارعانىن ايتقان.
تۇركىستان وبلىستىق پوليتسيا دەپارتامەنتى قىلمىستىق ءىس قوزعالعانىن حابارلادى. الدىن الا دەرەك بويىنشا، ەر ادام ايەلىنە اۋىر دەنە جاراقاتىن سالىپ، ونىڭ ولىمىنە سەبەپ بولعان. كەيىن ءوز-وزىنە قول جۇمساعان.
قازا بولعانداردىڭ ارتىندا 13, 9, 6 جانە 3 جاستاعى ءتورت بالا قالدى. ولاردىڭ ءبىرىنىڭ مۇمكىندىگى شەكتەۋلى ەكەنى بەلگىلى بولدى.
