قىرعىزستان استاناسى بىشكەكتىڭ ءبىرىنشى ماي اۋداندىق سوتى كاسىپقوي بوكسشى دميتري بيۆولدىڭ بۇرىنعى ايەلى ەكاتەرينا بيۆولدى قاماۋعا الۋ تۋرالى سىرتتاي شەشىم شىعاردى، دەپ حابارلايدى "ادىرنا" ۇلتتىق پورتالى.
شەشىمنىڭ شىعۋىنا ەكاتەرينا بيۆولدىڭ 21 قازاندا الەۋمەتتىك جەلىدە جاريالاعان ۆيدەوسى سەبەپ بولعان. بەينەجازبادا ول قىرعىز جانە قازاق ۇلتتارىن قورلايتىن سوزدەر ايتقان.
وسىعان بايلانىستى بىشكەك قالالىق ىشكى ىستەر باسقارماسىنىڭ تەرگەۋ قىزمەتى قىرعىزستان قىلمىستىق كودەكسىنىڭ 330-بابى – “ناسىلدىك، ەتنوستىق، ۇلتتىق، ءدىني نەمەسە ايماقارالىق ارازدىق تۋعىزۋ” بابى بويىنشا قىلمىستىق ءىس قوزعادى. بۇل باپقا سايكەس بەس جىلدان جەتى جىلعا دەيىن باس بوستاندىعىنان ايىرۋ جازاسى قاراستىرىلعان.
سوتتىڭ شەشىمىمەن 1990 جىلى تۋعان كۇدىكتى ەكاتەرينا بيۆولدى سىرتتاي قاماۋعا الۋ جانە ونى بىشكەكتەگى №21 تەرگەۋ يزولياتورىنا جىبەرۋ تۋرالى قاۋلى شىعارىلدى.
بۇعان دەيىن قىرعىزستانداعى بەس ادۆوكات قوعام وكىلدەرى اتىنان ۇندەۋ جاساپ، ەكاتەرينا بيۆولدىڭ ارەكەتىنە قۇقىقتىق باعا بەرۋگە جانە ءىس قوزعاۋعا دايىن ەكەنىن مالىمدەگەن. ولار ءتىپتى رەسەيگە بارىپ، كۇدىكتىنى جاۋاپقا تارتۋعا كۇش سالاتىنىن ايتقان.
ەكاتەرينا بيۆول – رەسەي ازاماتى، تەگىمەن قىرعىزستان تۋماسى. ول جارتىلاي اۋىر سالماقتاعى تانىمال كاسىپقوي بوكسشى دميتري بيۆولدىڭ بۇرىنعى ايەلى.
بۇعان دەيىن قىرعىزستاننىڭ ىشكى ىستەر مينيسترلىگى ەكاتەرينا بيۆولعا قاتىستى تەرگەۋگە دەيىنگى تەكسەرىس باستاعانى تۋرالى جازعان ەدىك.
