بۇرىنعى مينيسترلەر كابينەتى توراعاسىنىڭ ورىنباسارى، ۇلتتىق قاۋىپسىزدىك مەملەكەتتىك كوميتەتىنىڭ (ۇقمك) ەكس-توراعاسى قامشىبەك تاشيەۆ گەرمانيادان قىرعىزستانعا ورالدى. 13 اقپانعا قاراعان ءتۇنى ونى «ماناس» اۋەجايىندا قىزمەتتىك كولىكتەرگە ۇقساس بىرنەشە اۆتوكولىك قارسى العان، دەپ حابارلايدى "ادىرنا".
بۇعان دەيىن تاشيەۆتىڭ ۇندەۋىن جاريالاعان جۋرناليست نۇرعازى انارقۇلوۆ الەۋمەتتىك جەلىلەردە تاشيەۆتىڭ ەمى ءالى اياقتالماعانىن، الايدا قالىپتاسقان جاعدايعا بايلانىستى ەلگە ورالۋعا ءماجبۇر بولعانىن جازدى.
ەسكە سالايىق، 10 اقپاندا قىرعىز رەسپۋبليكاسىنىڭ پرەزيدەنتى سادىر جاپاروۆ جارلىققا قول قويىپ، سوعان سايكەس قامشىبەك تاشيەۆ مينيسترلەر كابينەتى توراعاسىنىڭ ورىنباسارى – ۇلتتىق قاۋىپسىزدىك مەملەكەتتىك كوميتەتىنىڭ توراعاسى قىزمەتىنەن بوساتىعان بولاتىن.
جۋمگالبەك شابدانبەكوۆ ۇلتتىق قاۋىپسىزدىك مەملەكەتتىك كوميتەتى توراعاسىنىڭ مىندەتىن ۋاقىتشا اتقارۋشى بولىپ تاعايىندالعان. سونداي-اق ۇقمك توراعاسىنىڭ ءۇش ورىنباسارى دا قىزمەتىنەن بوساتىلعان ەدى.
12 اقپاندا جوگوركۋ كەنەشتىڭ سپيكەرى نۋرلانبەك تۋرگۋنبەك ۋلۋ ءوز وكىلەتتىگىن توقتاتتى. جاڭا توراعا بولىپ مارلەن ماماتاليەۆ سايلانعان.
تاشيەۆتىڭ ءوزى اۋىرىپ قالعانىن جانە پرەزيدەنتتىڭ رۇقساتىمەن گەرمانياعا بارعانىن مالىمدەگەن ەدى. ونىڭ ايتۋىنشا، ول بۇرىن وتا جاسالعان كلينيكادا تەكسەرۋدەن ءوتۋى قاجەت بولعان. سونىمەن قاتار، ول قىزمەتتەن بوساتىلۋى ءوزى ءۇشىن كۇتپەگەن جاعداي بولعانىن ايتقان.
