قازاقستان رەسپۋبليكاسىنىڭ وقۋ-اعارتۋ ءمينيسترى جۇلدىز سۇلەيمەنوۆا ەلىمىزدەگى مۇعالىمدەر اراسىنداعى ەڭ اۋقىمدى ءارى بەدەلدى بايقاۋدىڭ جەڭىمپازدارىن ۇزدىك پەداگوگ» اتاعىمەن ماراپاتتادى، دەپ حابارلايدى ۆەدومستۆونىڭ ءباسپاسوز قىزمەتى.
بيىلعى جىلى بۇل اتاققا قازاقستاندىق 64 مۇعالىم لايىقتى دەپ تانىلدى. جەڭىمپازدار ماراپاتپەن بىرگە 1000 اەك كولەمىندەگى سىياقىعا يە بولدى. ەلىمىزدە 2012 جىلدان باستاپ وتكىزىلىپ كەلە جاتقان ءداستۇرلى بايقاۋدىڭ ناتيجەسى بويىنشا وسىعان دەيىن 752 ۇستاز «ۇزدىك پەداگوگ» اتاعىن يەلەنگەن.
«بۇل بايقاۋ ءداستۇرلى تۇردە وتكىزىلىپ كەلەدى. مەملەكەتتىڭ ۇستازداردى قولداۋى ءبىلىم ساياساتىنىڭ باستى باعىتى رەتىندە ايقىندالادى. رەسپۋبليكا كولەمىندە ۇزدىك پەداگوگتەر پۋلى قالىپتاستىرىلدى. ەندىگى مىندەت – ءار ءبىلىم بەرۋ دەڭگەيى بويىنشا ۇزدىك ۇستازدارىمىزدىڭ وزىق تاجىريبەسىن كەڭىنەن تاراتىپ، جاس پەداگوگتەردى تاعىلىمدامادان وتكىزۋ ارقىلى كاسىبي دامۋىنا جۇيەلى قولداۋ كورسەتۋ. ءبىزدىڭ باستى ماقساتىمىز – ءار بالانىڭ الەۋەتىن اشۋعا، ومىردە ءوز ورنىن تابۋعا مۇمكىندىك بەرەتىن ءادىل، قولجەتىمدى جانە ساپالى ءبىلىم جۇيەسىن قالىپتاستىرۋ. مەملەكەت باسشىسىنىڭ قولداۋى مەن قوعامنىڭ سەنىمى – وسى جۇمىستىڭ باستى قوزعاۋشى كۇشى»، - دەدى مينيستر ءوز قۇتتىقتاۋىندا.
ايتا كەتۋ كەرەك، بيىلعى جىلى «ۇزدىك پەداگوگ» رەسپۋبليكالىق بايقاۋىنىڭ ىرىكتەۋ كەزەڭىنە 1468 مامان قاتىسىپ، ودان وتكەن 793 پەداگوگ وبلىستىق دەڭگەيدە باق سىنادى. ءداستۇرلى كونكۋرستىڭ فينالدىق كەزەڭىنە 174 مامان جولداما الدى. ونىڭ ىشىندە ورتا ءبىلىم بەرۋ، كاسىپتىك جانە تەحنيكالىق ءبىلىم بەرۋ، مەكتەپكە دەيىنگى، قوسىشا ءبىلىم بەرۋ ۇيىمدارىنىڭ پەداگوگتەرى بار.
ۇزدىك پەداگوگتەردى انىقتاۋ جونىندەگى كوميسسيا بيىلعى جىلدىڭ قىركۇيەك ايىندا قۇرىلىپ، ونىڭ قۇرامىندا وقۋ-اعارتۋ ءبىرىنشى ۆيتسە-ءمينيسترى مايرا مەلدەبەكوۆا، ورتا ءبىلىم كوميتەتىنىڭ توراعاسى قانىبەك جۇماشەۆ، مەكتەپكە دەيىنگى ءبىلىم بەرۋ دەپارتامەنتى ديرەكتورىنىڭ ورىنباسارى گۇلنار يسكاكوۆا، تەحنيكالىق جانە كاسىپتىك ءبىلىم دەپارتامەنتى ديرەكتورىنىڭ ورىنباسارى اقزيرا قاسىموۆا، «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ جانە جەرگىلىكتى اتقارۋشى ورگانداردىڭ وكىلدەرى ەندى.
بۇل سايىسقا ءبىلىم بەرۋ ۇيىمدارىندا بەس جىل ۇزدىكسىز ەڭبەك ءوتىلى بار ماماندار قاتىسا الادى. كونكۋرس بارىسىندا پەداگوگتەردىڭ ءبىلىم بەرۋ جۇيەسىن دامىتۋعا قوسقان ۇلەسى، جۇمىسىنىڭ تيىمدىلىگى مەن كاسىبي شەبەرلىگى ەسكەرىلەدى.
