اتا-انالاردىڭ ءوز بالاسىن كۇندەلىكتى ەركەلەتۋىن ەندى مۇعالىمدەر قاداعالايدى

2785
Adyrna.kz Telegram
جامبىل وبلىسى اكىمدىگىنىڭ ءبىلىم باسقارماسى مۇعالىمدەرگە كۇندەلىكتى "ەركەلەتۋ ساعاتىن" وتكىزۋدى بۇيىردى. "ەركەلەتۋ ساعاتىندا" مۇعالىمدەر الەۋمەتتىك جەلى ارقىلى اتا-انالاردىڭ ءوز بالاسىن كۇندەلىكتى ەركەلەتۋىن قاداعالاپ، وبلىس اكىمدىگىنە مالىمەت بەرۋى ءتيىس، دەپ حابارلايدى "ادىرنا" ۇلتتىق پورتالى. 
ەرەكشە "ەركەلەتۋ ساعاتى" جايلى قوعام بەلسەندىسى ارنات بايسەيىتوۆ جازدى.
- مىناۋ نە ماسقارا ەندى، جامبىل وبلىسى اكىمدىگى؟ “ەركەلەتۋ ساعاتى” نەسى تاعى؟ مۇعالىمدەردىڭ جالاقىسىن ءسال كوتەرىپ، جۇمىستى ءۇيىپ توگىپ بەرۋدى دوعارۋ قاجەت دەپ ەسەپتەيمىن. مۇعالىم دە ادام! ونىڭ جەكە ءومىرى جوق پا؟ ەگەر بالا مەيىرىم كورمەي جۇرسە، وعان باسقا ورگان ارالاسسىن. مۇعالىم - ءبىلىم بەرەتىن مامان، - دەپ جازدى اۆتور.
ارنات بايسەيىتوۆتىڭ سۇراعىنا جاۋاپ بەرگەن جامبىل وبلىسىنىڭ ءبىلىم باسقارماسى اتالمىش باستامانىڭ وتباسىلىق قۇندىلىقتاردى نىعايتۋمەن، ءبىلىم سالاسى مەن تاربيە جۇمىسىن ۇشتاستىرۋمەن بايلانىستى ەكەنىن جەتكىزدى.
- قازىرگى تاڭدا ءبىلىم سالاسىنداعى تاربيە جۇمىسى تاربيەنىڭ تۇجىرىمدامالىق نەگىزدەرىنە سايكەس قۇرىلعان باعىتتار بويىنشا جۇزەگە اسىرىلۋدا. جوعارىدا كورسەتىلگەن حات كامەلەتكە تولماعاندار اراسىندا ءتۇرلى كەلەڭسىز وقيعالاردىڭ الدىن الۋ ءۇشىن اتا-انالارمەن بايلانىس ورناتىپ، وتباسىلىق تاربيەنىڭ ماڭىزدى ەكەندىگىن ەسكەرۋ ماقساتىندا جولدانعان. دەگەنمەن، جولدانعان حاتتىڭ ماعىنالىق تۇرعىدا دۇرىس قۇرىلماۋىنا بايلانىستى جاۋاپتى مامانعا قىزمەتتىك تەرگەپ-تەكسەرۋ جۇرگىزىلىپ، تارتىپتىك شارا قولدانىلادى. سونىمەن قاتار، ءبىلىم باسقارماسى تاراپىنان پەداگوگتاردى جۇمىستان تىس ۋاقىتتا جۇمىسقا تارتۋ تۋرالى تاپسىرما بەرىلمەگەندىگىن جانە ارتىق جۇمىس مىندەتتەلمەيتىنىن حابارلايمىز، - دەپ حابارلادى ءبىلىم باسقارماسى وكىلدەرى.
قوعامدىق پىكىرتالاس تۋدىرعان مالىمدەمەگە قاتىستى سىن ايتىپ جاتقاندار كوپ.
"قايتادان قاعازباستىلىق... وتىرىك تسيفرلار... كورسەتەتىن بولادى. ارتىق جۇمىستان مۇعالىمدى بوساتتى ەمەس پە؟ مۇعالىم وقۋشىعا ءبىلىم بەرۋى كەرەك، ال كۇندەلىكتى كوڭىل-كۇيى ءۇشىن الدىمەن اتا-انا جاۋاپتى. نە بولسا سونى مۇعالىمدەردىڭ ارقاسىنا ارتا بەرۋ دۇرىس ەمەس دەپ ويلايمىن" دەپ جازدى جەلى قولدانۋشىلارى.

"ادىرنا" ۇلتتىق پورتالى

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket