ءۇندىستان پرەزيدەنتى دراۋپادي مۋرمۋ مىنگەن تىكۇشاق ەلدىڭ وڭتۇستىگىندەگى كەرالا شتاتىنا قونۋ كەزىندە جاڭا توسەلگەن اسفالتقا ءتۇسىپ كەتكەن، دەپ حابارلايدى "ادىرنا" ۇلتتىق پورتالى The Times of India باسىلىمىنا سىلتەپ.
وقيعا پرەزيدەنتتىڭ كەرالا شتاتىنا جاساعان ءتورت كۇندىك رەسمي ساپارى بارىسىندا بولعان. باق مالىمەتىنشە، تىكۇشاقتىڭ قونۋ الاڭىنا بىرنەشە ساعات بۇرىن عانا جاڭا اسفالت توسەلگەن.
اۋە كەمەسى جەرگە قونعان ساتتە الاڭنىڭ ءبىر بولىگى وپىرىلىپ، تىكۇشاق دوڭگەلەكتەرى جۇمساق اسفالتقا كىرىپ كەتكەن. پرەزيدەنت پەن ەكيپاج مۇشەلەرى زارداپ شەككەن جوق.
پوليتسيا مەن ءورت سوندىرۋشىلەر وقيعا ورنىنا دەرەۋ كەلىپ، تىكۇشاقتى قولمەن يتەرىپ شىعارىپ، قاۋىپسىزدىكتى قامتاماسىز ەتتى.
كەيىن دراۋپادي مۋرمۋ ساپارىن اۆتوكولىكپەن جالعاستىرۋعا ءماجبۇر بولدى.
ۇقساس جاڭالىقتار
