ۇندىستاندىق ازامات 11 كۇن بويى تالدىڭ باسىندا وتىرىپ، ءوزىن وقشاۋلاعان

4153
Adyrna.kz Telegram

كوروناۆيرۋسپەن اۋىرعان ۇندىستاندىق ازامات تۋىستارىنا اۋرۋىن جۇقتىرماس ءۇشىن ءوزىن وقشاۋلاپ، 11 كۇن بويى تالدىڭ باسىندا وتىرعان، دەپ حابارلايدى «ادىرنا» ۇلتتىق پورتالى The Print سايتىنا سىلتەمە جاساپ.

ءۇندىستاننىڭ تەلانگانا شتاتىندا تۇراتىن راماۆات شيۆا نايك ەسىمدى ستۋدەنت كوروناۆيرۋس جۇقتىرعان. الايدا ول اۋرۋحاناداعى ادامداردىڭ كوپتىگىنە بايلانىستى  اۋرۋحانادان ورىن تابا الماعان. ونىڭ وتباسى كىشكەنتاي ءبىر بولمەلى ۇيدە تۇرادى ەكەن. سوندىقتان ول اعاش باسىنا شىعىپ، ءوزىن وقشاۋلاعان. ول ءۇشىن اعاشتىڭ باسى جالعىز عانا قاۋىپسىز ورىن بولعان. ستۋدەنت بامبۋكتان كىشىگىرىم پلاتفورما جاساپ، اعاش باسىنا ورنالاستىرعان. ۇستىنە كورپە توسەپ، سوندا تۇنەگەن. اتا-اناسى ۇلىنا ارقانداعى شەلەكتىڭ كومەگىمەن تاماق پەن سۋ بەرگەن. شيۆا تالدىڭ باسىندا ۋاقىتىنىڭ كوپ بولىگىن تەلەفون قاراۋمەن وتكىزگەن.

بۇل وقيعا بۇقارالىق اقپارات قۇرالدارىندا جاريالانعاندا، جەرگىلىكتى بيلىك جىگىتكە اۋىلىنىڭ جانىنداعى جاتاقحانادان ورىن بەرىپتى. سودان كەيىن ول كارانتيننىڭ بىرنەشە كۇنىن جايلى جەردە وتكىزگەن.

قيىن جاعدايدان شىعۋدىڭ جولىن ىزدەگەن ۇندىستاندىقتار سوڭعى كەزدەگى ەلدەگى جاعدايعا بايلانىستى وزدەرىن وقشاۋلاۋ ءۇشىن جۋىنۋ بولمەلەرىن نەمەسە ۋاقىتشا ورىنداردى پانالاعان.

ايتا كەتۋ كەرەك، سوڭعى اپتالاردا ءۇندىستاندا تاۋلىگىنە ءجۇز مىڭداعان ادام كوروناۆيرۋس جۇقتىرىپ، ەلدەگى ەپيدەميولوگيالىق احۋال كۇرت ناشارلاعان.

حالىقارالىق كومەككە قاراماستان، مۇنداعى اۋرۋحانالاردا ناۋقاستارعا توسەك-ورىن جانە وتتەگى جەتىسپەي، مايىتتەر كوشەدە ورتەنىپ جاتىر.

"ادىرنا" ۇلتتىق پورتالى

پىكىرلەر