رەسپۋبليكا كۇنى قارساڭىندا جارما اۋدانىنىڭ شار قالاسىندا كۇردەلى جوندەۋدەن وتكەن قالالىق مادەنيەت ءۇيى پايدالانۋعا بەرىلدى. اشىلۋ سالتاناتىنا وبلىس اكىمى بەرىك ءۋالي، زيالى قاۋىم وكىلدەرى جانە جەرگىلىكتى تۇرعىندار قاتىستى.
شار قالالىق مادەنيەت ءۇيى 1960 جىلى بوي كوتەردى. سوڭعى رەت نىسانعا 2002 جىلى جوندەۋ جۇرگىزىلىپ، سىرتقى قاپتاماسى جاڭارتىلىپ، ەدەندەرى اۋىستىرىلىپ، سۋ جۇيەسى تارتىلعان بولاتىن.
بيىل «جول كارتاسى» باعدارلاماسى اياسىندا وبلىستىق بيۋدجەتتەن قارجى ءبولىنىپ، عيماراتقا تولىق كۇردەلى جوندەۋ جۇرگىزىلدى. شاتىرى اۋىستىرىلىپ، بارلىق تەرەزە، ەسىك جانە ەدەن جابىندارى جاڭارتىلدى. سۋ، جىلۋ جانە كارىز جۇيەلەرى اۋىستىرىلىپ، جاڭا جىلۋ قازاندىعى ىسكە قوسىلدى. ساحنا كەڭەيتىلىپ، زاماناۋي جارىق جانە دىبىس قۇرىلعىلارى، سونداي-اق LED ەكران ورناتىلدى. قوسىمشا بولمەلەر سالىندى.
ايتا كەتەيىك، بيىلعى ماۋسىم ايىندا ايماق باسشىسى جارما اۋدانىنا جۇمىس ساپارىمەن كەلگەندە شارداعى مادەنيەت ءۇيىن ارالاپ، مەردىگەر كومپانياعا جوندەۋ جۇمىستارىن ساپالى ءارى ۋاقىتىندا اياقتاۋدى تاپسىرعان بولاتىن.
وبلىس اكىمى ەلدى مەكەن تۇرعىندارىن ماڭىزدى مادەني نىساننىڭ قايتا اشىلۋىمەن قۇتتىقتادى.
ء«بىز بۇگىن رەسپۋبليكا كۇنى قارساڭىندا شار قالالىق مادەنيەت ءۇيىنىڭ قايتا اشىلۋ سالتاناتىندا باس قوسىپ وتىرمىز. كوكتەمدە وسىندا كەلگەن كەزىمدە بۇرىنعى عيماراتتى قايتا جاڭعىرتۋ تۋرالى شەشىم قابىلداعان بولاتىنمىن. مىنە، بۇگىن ادەمى، كەڭ، جارىق، بيىك، سۋ جاڭا مادەنيەت ءۇيىن وزدەرىڭىزبەن بىرگە اشقالى تۇرمىز. مەملەكەت باسشىسى قاسىم-جومارت توقاەۆ بيىلعى قازاقستان حالقىنا ارناعا جولداۋىندا ء«تىل، مادەنيەت، رۋحانيات ماسەلەسى ۇلتتىق مۇددەنىڭ وزەگى رەتىندە سانالاتىن. ارينە، بۇل دۇرىس، ارقايسىسى ۇلت بولمىسىنىڭ ارقاۋى» دەپ ايرىقشا اتاپ وتكەن بولاتىن. ءبىز دە وسى باعىتتى باسشىلىققا الا وتىرىپ، مادەنيەت نىساندارىن جاڭعىرتۋ ىسىنە باسا ءمان بەرىپ كەلەمىز. شار قالاسىنداعى عيماراتى تولىق كۇردەلى جوندەۋدەن وتكەن بۇل ونەر ورداسى ءوڭىردىڭ مادەني تىنىسىن جانداندىرىپ، قالا تۇرعىندارىنىڭ رۋحاني ومىرىندە ەرەكشە ورىن الادى دەپ سەنەمىز. بۇل جەردە شىعارماشىلىق ۇجىمدار ءوز ونەرىن شىڭداپ، جاستار رۋحاني تاربيە الىپ، ءتۇرلى مادەني شارالار ۇيىمداستىرىلاتىن بولادى. وسى يگى ءىستىڭ جۇزەگە اسۋىنا اتسالىسقان قۇرىلىسشىلارعا، جوبالاۋشىلارعا، مادەنيەت سالاسىنىڭ قىزمەتكەرلەرىنە جانە بارشا تۇرعىندارعا شىنايى ريزاشىلىعىمدى بىلدىرەمىن. شارعا وسىمەن ءۇشىنشى رەت كەلىپ وتىرمىن. قالانىڭ دامۋى ۇنەمى مەنىڭ نازارىمدا، جەكە باقىلاۋىمدا بولادى»، - دەدى وبلىس اكىمى.
جەرگىلىكتى تۇرعىندار مادەنيەت ءۇيىنىڭ جاڭعىرىپ، قايتا اشىلۋىن جىلى قابىلداپ، ۇلەس قوسقاندارعا ريزاشىلىقتارىن ءبىلدىردى.
«بۇگىن شار قالاسى تۇرعىندارى ءۇشىن اق تۇيەنىڭ قارنى جارىلعان كۇن دەپ ايتۋعا بولادى. مادەنيەت ءۇيىمىزدىڭ قايتا جاڭارىپ، جارقىراعان ساتىنە كۋا بولىپ وتىرمىز. شار قالاسىندا باسسەين قۇرىلىسى باستالدى. كەلەسى جىلى بىرنەشە كوشەنىڭ جولى جوندەلەتىنىن ايتتى. وبلىس باسشىلىعىنا العىس ايتامىز»، - دەدى قالا تۇرعىنى تالعات قۇماروۆ.
ايماق باسشىسى «كاۋسار» حالىق ۇلت-اسپاپتار وركەسترى جانە «سۇلۋىم» ەسترادالىق قىزدار توبىنىڭ كونتسەرتتىك باعدارلاماسىن تاماشالادى.
بيىل وڭىردە بىرقاتار مادەني نىساندار جاڭارتىلدى. اباي اۋدانىنىڭ قاراۋىل اۋىلىنداعى مادەنيەت ۇيىنە، اباي اتىنداعى وبلىستىق امبەباپ كىتاپحاناعا، اباي اتىنداعى تەاترعا جانە سەمەي قالاسىنداعى ف.م.دوستوەۆسكي اتىنداعى ادەبي-مەموريالدىق مۇراجايدىڭ شاتىرىنا اعىمداعى جوندەۋ جۇمىستارى جۇرگىزىلدى. رەسپۋبليكالىق ماڭىزى بار تاريحي-ساۋلەت ەسكەرتكىشى سانالاتىن وبلىستىق تاريحي-ولكەتانۋ مۋزەيىندە كۇردەلى جوندەۋ جۇمىستارى باستالدى.
2025 جىلى ايماقتىڭ مادەني ينفراقۇرىلىمىن دامىتۋ ماقساتىندا رەسپۋبليكالىق بيۋدجەت ەسەبىنەن بەس جاڭا نىساننىڭ قۇرىلىسىنا قارجى ءبولىندى. اتاپ ايتقاندا، ءۇرجار اۋدانىنداعى جوعارعى ەگىنسۋ اۋىلىندا «اۋىل – ەل بەسىگى» باعدارلاماسى اياسىندا 100 ورىندىق كلۋبتىڭ قۇرىلىسى اياقتالۋعا جاقىن. سونداي-اق بورودۋليحا اۋدانىنىڭ كامىشەنكا، نوۆوپوكروۆكا، بەسقاراعاي اۋدانىنىڭ بەگەن، گلۋحوۆكا جانە ەرنازار اۋىلدارىندا، اقسۋات اۋدانىنىڭ كوكجىرا اۋىلىندا جاڭا مادەنيەت ۇيلەرىنىڭ قۇرىلىسى جۇرگىزىلۋدە.
