پرەزيدەنت قاسىم-جومارت توقاەۆ قوستاناي قالاسىندا Kia Kazakhstan اۆتوكولىك زاۋىتىنىڭ اشىلۋ راسىمىنە ونلاين فورماتتا قاتىسىپ، قاتىسۋشىلاردى تاريحي وقيعامەن قۇتتىقتادى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
مەملەكەت باسشىسى زاۋىتتىڭ اشىلۋىن ەلىمىزدىڭ ماشينا جاساۋ سالاسىن دامىتۋ جولىنداعى ماڭىزدى قادام دەپ اتاپ ءوتتى. پرەزيدەنت ەكى جىل بۇرىن قوستاناي ساپارى كەزىندە KIA Sportage اۆتوكولىگىنىڭ ءوندىرىسى ىسكە قوسىلعانىن ەسكە سالدى.
«Kia Motors كورپوراتسياسىمەن جاسالعان كەلىسىمنىڭ ناتيجەسىندە جاڭا زاۋىت ىسكە قوسىلىپ وتىر. بۇل – قازاقستان مەن كورەيا اراسىنداعى ستراتەگيالىق سەرىكتەستىكتىڭ جانە ءوزارا ءتيىمدى قارىم-قاتىناستىڭ ناقتى كورىنىسى»، – دەدى قاسىم-جومارت توقاەۆ.
مەملەكەت باسشىسى KIA Corporation پرەزيدەنتى حو-سۋنگ سونگقا جانە كومپانيا ۇجىمىنا العىسىن ءبىلدىرىپ، اتقارىلعان اۋقىمدى جۇمىستى جوعارى باعالادى.
«قازىر قازاقستاندا كورەيانىڭ 800-دەن استام كومپانياسى تابىستى جۇمىس ىستەپ جاتىر. سونىڭ ىشىندە اۆتوكولىك جاساۋ سالاسى – ءوزارا ءتيىمدى ىقپالداستىقتىڭ ايقىن مىسالى. Kia – الەمدەگى ەڭ ءىرى 10 اۆتوكولىك ءوندىرۋشىنىڭ ءبىرى ءارى قازاقستاندىقتار اراسىندا ەڭ تانىمال ءۇش برەندتىڭ قاتارىنا كىرەدى»، – دەدى پرەزيدەنت.
سونداي-اق ول KIA اتاۋىنىڭ «كوتەرىلۋ» جانە «ازيا» دەگەن ماعىنالاردى بىلدىرەتىنىن اتاپ ءوتىپ، كومپانيانى ازيانىڭ جاڭا ەكونوميكالىق ورلەۋىنىڭ سيمۆولى دەپ اتادى.
ايتا كەتەيىك، بۇعان دەيىن ۇلتتىق ەكونوميكا ءمينيسترى تيمۋر سۇلەيمەنوۆ اۆتوكولىكتەرگە سۇرانىستىڭ ارتۋى ەلدەگى تۇتىنۋشىلىق بەلسەندىلىكتىڭ وسكەنىن كورسەتەتىنىن مالىمدەگەن بولاتىن.
