قازاقستان Global Relocation Index 2026 حالىقارالىق رەيتينگىندە ورتالىق ازيا ەلدەرى اراسىندا ءبىرىنشى ورىنعا يە بولدى، دەپ حابارلايدى "ادىرنا" ۇلتتىق پورتالى.
رەيتينگتى جىل سايىن Rumavi كومپانياسى جاريالايدى.
زەرتتەۋ بارىسىندا الەمنىڭ 192 ەلى مەن اۋماعى 24 كورسەتكىش بويىنشا باعالانعان. ولار قارجىلىق جاعداي مەن سالىق جۇيەسى، ءومىر ءسۇرۋ ساپاسى مەن دەنساۋلىق ساقتاۋ، قاۋىپسىزدىك پەن تۇراقتىلىق، سونداي-اق كوشۋ جانە جاڭا ورتاعا بەيىمدەلۋ مۇمكىندىكتەرى سياقتى ءتورت نەگىزگى ساناتقا بىرىكتىرىلگەن. ناتيجەسىندە قازاقستان 62,9 بالل جيناپ، جالپى رەيتينگتە 192 ەلدىڭ ىشىندە 77-ورىنعا ورنالاستى.
ەل ەڭ جوعارى كورسەتكىشتى قارجىلىق جاعداي بويىنشا تىركەدى – 79 بالل. ءومىر ءسۇرۋ ساپاسى مەن دەنساۋلىق ساقتاۋ، سونداي-اق قاۋىپسىزدىك پەن تۇراقتىلىق كورسەتكىشتەرى بويىنشا قازاقستان 60 باللدان جيناعان. ال كوشۋ جانە بەيىمدەلۋ شارتتارى 51 باللمەن ەڭ تومەن باعالانعان. ورتالىق ازيا ەلدەرى اراسىندا قازاقستاننان كەيىن وزبەكستان (59,9 بالل) مەن قىرعىزستان (59,3 بالل) ورنالاسقان. ودان كەيىن تاجىكستان (55,1 بالل) مەن تۇرىكمەنستان (52,3 بالل) كەلەدى.
سالىستىرمالى تۇردە، گرۋزيا 69,3 بالل جيناپ، رەيتينگتە 14-ورىنعا تۇراقتاعان. ازەربايجان – 61,5, اقش – 60, رەسەي – 58,9, ال قىتاي 58,6 بالل العان.
الەمدىك رەيتينگتىڭ كوشىن 72,8 باللمەن ەستونيا باستادى. زەرتتەۋ اۆتورلارى ەلدىڭ جوعارى كورسەتكىشىنە دامىعان بانك جۇيەسى، قولايلى بيزنەس ورتاسى، تۇرعىن ءۇيدىڭ قولجەتىمدىلىگى جانە جاسىل ايماقتاردىڭ كوپتىگى اسەر ەتكەنىن اتاپ وتكەن. ال رەيتينگتىڭ سوڭعى ساتىسىندا 39,5 باللمەن اۋعانستان تۇر.
سونىمەن قاتار Rumavi ماماندارى وتباسىلارعا، زەينەتكەرلەرگە، تسيفرلىق كوشپەندىلەرگە، كاسىپكەرلەرگە جانە سالىقتىق جۇكتەمەگە باسىمدىق بەرەتىن ازاماتتارعا ارنالعان بەس جەكە رەيتينگ ازىرلەگەن. قازاقستان بۇل ساناتتاردىڭ بارلىعىندا دا ورتالىق ازيا وڭىرىندەگى كوشباسشىلىق ورنىن ساقتاپ قالعان.
زەرتتەۋ اۆتورلارى Global Relocation Index رەيتينگى تاۋەلسىز جوبا ەكەنىن حابارلادى.
