جامبىل وبلىسى بايزاق اۋدانىندا پروكۋراتۋرانىڭ ارالاسۋىنان كەيىن جۇمىسشىلاردىڭ ەڭبەكاقىسى تولىق وتەلدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
بايزاق اۋدانىنىڭ پروكۋراتۋراسى جۇرگىزگەن تەكسەرىس بارىسىندا «بايزاق سۋ» مەملەكەتتىك كوممۋنالدىق كاسىپورنىندا (شجق مكك) ەڭبەك زاڭناماسىنىڭ بۇزىلعانى انىقتالدى.
كاسىپورىننىڭ قارجىلىق شىعىندارىن نەگىزسىز جوسپارلاۋىنىڭ سالدارىنان 2024 جىلدىڭ ماۋسىم ايىندا 146 قىزمەتكەرگە 18,2 ميلليون تەڭگە كولەمىندە جالاقى قارىزى جينالعان.
پروكۋراتۋرانىڭ قاداعالاۋ اكتىسى ناتيجەسىندە بۇل بەرەشەك تولىعىمەن وتەلىپ، كىنالى تۇلعالار تارتىپتىك جاۋاپكەرشىلىككە تارتىلدى.
بيىل جامبىل وبلىسىنىڭ پروكۋراتۋراسى مەن ۋاكىلەتتى ورگانداردىڭ بىرلەسكەن شارالارىنىڭ ارقاسىندا 1 213 جۇمىسشىنىڭ الدىنداعى 241 ميلليون تەڭگە جالاقى بەرەشەگى وتەلگەن. جالپى ءوڭىر پروكۋرورلارى 16 مىڭنان استام جۇمىسشىنىڭ ەڭبەك قۇقىقتارىن قورعاۋعا ۇلەس قوستى.
