تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ رەسەيلىك Telegram قوسىمشاسىنىڭ نەگىزىن قالاۋشى پاۆەل دۋروۆتىڭ قازاقستانعا نە ءۇشىن كەلگەنىن ايتتى. بۇل تۋرالى ول پارلامەنت پالاتالارىنىڭ بىرلەسكەن وتىرىسى الدىندا مالىمدەدى، دەپ حابارلايدى “ادىرنا” ۇلتتىق پورتالى.
«پاۆەل دۋروۆ وسىندا ءجۇر، قازاقستاندى كورگىسى كەلەدى. وزگە قالالاردا دا (استانادان باسقا – رەد.) بولۋى مۇمكىن. قازىر جوسپاردى پىسىقتاپ جاتىرمىز. وتە قىزىعۋشىلىقپەن كەلىپتى. بۇيىرسا، كەلەشەكتە تابىستى جوبالاردى ىسكە اسىرامىز دەپ ويلايمىن. ازىرشە قازىر ناقتى جوبالار تۋرالى ەشتەڭە ايتا المايمىن. بىراق وعان قازاقستاننىڭ ۇناۋى ءۇشىن، بۇل جاقتان بىرلەسكەن تەحنولوگيالىق بويىنشا ۇلكەن كەلەشەك كورۋى ءۇشىن ءبارىن جاسايمىز. جۇمىس ىستەيمىز»، - دەدى مينيستر پارلامەنت پالاتالارىنىڭ بىرلەسكەن وتىرىسى الدىندا.
سونداي-اق، ول قازاقستاندا پاۆەل دۋروۆ نەگىزىن قابىلداعان قوسىمشاسىن 10 ميلليوننان استام ادام قولداناتىنىن ايتتى.
ايتا كەتسەك، بۇعان دەيىن پاۆەل دۋروۆ فرانتسيا ازاماتتىعىن العانىن جاريالاپ، جاز بويى ورتالىق ازياعا باراتىنىن ايتقان ەدى.
بۇعان دەيىن قازاقستاننىڭ تسيفرلىق دامۋ ءمينيسترى جاسلان ماديەۆ پاۆەل دۋروۆتى قازاقستانعا شاقىرعان بولاتىن.
بىرنەشە اپتا بۇرىن قىرعىز بۇقارالىق اقپارات قۇرالدارى ونىڭ ىستىقكولگە بارعانىن حابارلاعان. كەشە، 27 ماۋسىمدا ول استاناعا كەلگەن.
