مەملەكەت باسشىسى قاسىم-جومارت توقاەۆ قازاقستاندىقتاردى رەسپۋبليكا كۇنىمەن قۇتتىقتادى، دەپ حابارلايدى “ادىرنا” ۇلتتىق پورتالى.
«بارشاڭىزدى رەسپۋبليكا كۇنىمەن شىن جۇرەكتەن قۇتتىقتايمىن!
ۇلتتىق مەرەكە حالقىمىزدى مىزعىماس قۇندىلىقتار توڭىرەگىنە توعىستىرىپ، جالپىۇلتتىق بىرەگەيلىگىمىزدى نىعايتا تۇسۋگە ىقپال ەتەدى.
ءبىز بەرەكەلى بىرلىك پەن ىرىستى ىنتىماقتىڭ ارقاسىندا اسا كۇردەلى سىن-قاتەرلەردى ەڭسەرىپ، اۋقىمدى وزگەرىستەردى جۇزەگە اسىرىپ كەلەمىز. قوعامداعى زاڭ مەن ءتارتىپ، ازاماتتاردىڭ ەڭبەكقورلىعى مەن كاسىبي بىلىكتىلىگى قازىرگى رەفورمالاردىڭ بەرىك تىرەگىنە ءارى قوزعاۋشى كۇشىنە اينالدى. ءبىز بولاشاققا نىق سەنىممەن قاراپ، ادىلەتتى قازاقستاندى قۇرۋ جولىندا ناقتى قادامدار جاساي بەرەمىز.
ەلىمىزدىڭ ەرتەڭى قانداي بولاتىنى ءاربىر وتانداسىمىزعا بايلانىستى ەكەنى انىق. ازاماتتارىمىز وسى قاستەرلى جاۋاپكەرشىلىكتى تەرەڭ ءتۇسىنىپ، مەملەكەتتىگىمىزدى نىعايتۋعا ءوز ۇلەسىن قوسادى دەپ سەنەمىن.
سىزدەرگە زور دەنساۋلىق، تولايىم تابىس جانە باق-بەرەكە تىلەيمىن!»، - دەلىنگەن قۇتتىقتاۋدا.
