الماتى قالاسىندا بالالار اراسىندا شەشەك اۋرۋىنىڭ كوبەيۋى تىركەلدى، دەپ حابارلايدى "ادىرنا" ۇلتتىق پورتالى.
رەسمي مالىمەتتەرگە سايكەس، 2025 جىلدىڭ توعىز ايىندا بۇل اۋرۋدىڭ جاعدايلارى وتكەن جىلمەن سالىستىرعاندا شامامەن 39 پايىزعا ارتقان. قالالىق بالالار جۇقپالى اۋرۋلار كلينيكالىق اۋرۋحاناسىنىڭ ديرەكتورىنىڭ ايتۋىنشا، وسى كەزەڭدە 183 بالا اۋرۋحاناعا جاتقىزىلعان، ولاردىڭ ىشىندە اۋىر اسقىنعان تۇرلەرمەن تۇسكەندەر سانى 40 پايىزعا كوبەيگەن.
مامانداردىڭ تۇسىندىرۋىنشە، شەشەك – اۋا ارقىلى جۇعاتىن ۆيرۋستىق اۋرۋ، ول دەنەدە قىشىنۋ مەن كوپىرشىكتەردىڭ پايدا بولۋىمەن سيپاتتالادى جانە كوبىنەسە بالالار اراسىندا تارايدى. اۋرۋ تىنىس الۋ مەن جۇيكە جۇيەسىنە دە اسەر ەتۋى مۇمكىن.
1–14 قازان ارالىعىندا 14 بالا جانساقتاۋ بولىمىنە تۇسكەن. ولاردىڭ كەيبىرىندە ەكى جاقتى وكپە قابىنۋى، تىرىسۋ جانە تىنىس جەتىسپەۋشىلىگى بايقالعان.
دارىگەرلردىڭ ايتۋىنشا، كوپتەگەن بالالار اۋرۋحاناعا كەش جەتكىزىلەدى.
«اتا-انالاردىڭ كوپشىلىگى اۋرۋدىڭ 8–10-كۇنى كەلىپ جاتادى. سول كەزدە اۋرۋ اسقىنىپ كەتەدى دە، ەمدەۋ قيىندايدى»، — دەدى قالالىق بالالار جۇقپالى اۋرۋلار كلينيكالىق اۋرۋحاناسىنىڭ ديرەكتورى.
قازىر ەڭ كوپ جاعداي مەكتەپكە دەيىنگى جانە باستاۋىش مەكتەپ جاسىنداعى بالالار اراسىندا تىركەلگەن. بۇل بارلىق ناۋقاستاردىڭ 61,7 پايىزىنا تەڭ.
شەشەككە قارسى ۆاكتسينا ۇلتتىق ەگۋ كۇنتىزبەسىنە ەنگىزىلمەگەن، سوندىقتان كوپشىلىگىندە يممۋنيتەت تەك اۋرۋدى وتكەرگەننەن كەيىن عانا قالىپتاسادى.
