Billboard جۋرنالى The World Album اتتى جاھاندىق مۋزىكالىق جوبانى 2026 جىلعى “گرەممي” سىيلىعىنىڭ Best Global Music Album (ەڭ ۇزدىك جاھاندىق مۋزىكالىق البوم) نوميناتسياسىنا ۇمىتكەرلەر قاتارىندا اتادى، دەپ حابارلايدى "ادىرنا" ۇلتتىق پورتالى.
بۇل – الەمنىڭ ءار ەلىنەن شىققان ورىنداۋشىلاردى بىرىكتىرگەن تاريحتاعى العاشقى مۋزىكالىق كومپيلياتسيا. البومعا 200 ءان، 93 ءتىل، 121 مۋزىكالىق جانر مەن باعىتى ەنگەن. جالپى ۇزاقتىعى – 12,5 ساعات.
جوبانىڭ اۆتورى جانە پروديۋسەرى برەندون بەكۆيت بۇل البومدى «بەيبىتشىلىك پەن بىرلىكتىڭ ءۇنى» دەپ سيپاتتادى. ونىڭ ايتۋىنشا، The World Album ونەردىڭ ادامزاتتى بىرىكتىرە الاتىنىن دالەلدەيدى.
قازاقستان اتىنان جوباعا ۇلى اباي قۇنانبايۇلىنىڭ “بويى بۇلعاڭ” ءانى ەنگىزىلگەن. ونى دانا ورمانباەۆا مەن ءمادي سىزدىقوۆ ورىندادى. ءان الەم ەلدەرىنىڭ مادەني جاۋھارلارى قاتارىندا ۇسىنىلىپ، ۇلتتىق رۋحتى بەينەلەيتىن تۋىندى رەتىندە تاڭدالعان.
جوبا العاشقى اپتاسىندا-اق الەمنىڭ بارلىق ەلىندە تىڭدالعان. تىڭداۋشىلاردىڭ قاتارىندا گۋام، كيۋراساو جانە فرانتسۋز پولينەزياسى سياقتى ايماقتار دا بار. وسىلايشا، The World Album تىڭدالۋ گەوگرافياسى بويىنشا تاريحي رەكورد ورناتقان.
بارلىق ورىنداۋشىلار ءوز اندەرىنە 100 پايىز قۇقىقتى ساقتايدى. سونىمەن قاتار، تابىستىڭ جارتىسىن قايىرىمدىلىققا باعىتتاۋ ۇسىنىلعان.
قازىر جوبا اۆتورلارى ءۇش گيننەس رەكوردىنا ءوتىنىم بەرىپ، International Artists Festival فەستيۆالىن ۇيىمداستىرۋدى جانە البومدى ءبىلىم بەرۋ باعدارلامالارىنا ەنگىزۋدى جوسپارلاپ وتىر.
