ازەربايجان پرەزيدەنتى يلحام اليەۆ Kazinform اگەنتتىگىنە سۇحبات بەردى، دەپ حابارلايدى "ادىرنا" ۇلتتىق پورتالى.
سۇقباتتا قازاقستانمەن اراداعى ساياسي، ەكونوميكالىق جانە مادەني بايلانىستاردىڭ جوعارى دەڭگەيدە دامىپ كەلە جاتقانى ايتىلعان. سونداي-اق، ول الداعى قازاقستانعا مەملەكەتتىك ساپارىنا قاتىستى جوسپارلارىمەن بولىسكەن.
پرەزيدەنتتىڭ ايتۋىنشا، ازەربايجان مەن قازاقستان اراسىنداعى قارىم-قاتىناس ءوزارا سەنىم مەن باۋىرلاستىققا نەگىزدەلگەن.
ء«بىز ورتاق تۇركى بىرەگەيلىگى مەن رۋحاني قۇندىلىقتارعا سۇيەنە وتىرىپ، شىنايى ستراتەگيالىق جانە وداقتاستىق سەرىكتەستىكتى ورناتتىق»، – دەدى اليەۆ.
مەملەكەت باسشىسى ەكى ەلدىڭ جوعارى دەڭگەيدەگى تۇراقتى ديالوگىنىڭ ناتيجەسىندە ساۋدا-ەكونوميكالىق جانە مادەني ىنتىماقتاستىق ايتارلىقتاي نىعايعانىن اتاپ ءوتتى.
سوڭعى ءۇش جىلدا اليەۆ قازاقستانعا جەتىنشى رەت كەلمەك. ول ءار ساپارىندا قازاقستاننىڭ دامۋىنا كۋا بولاتىنىن جانە پرەزيدەنت قاسىم-جومارت توقاەۆ جۇرگىزىپ وتىرعان ساياساتتىڭ ناتيجەلى ەكەنىن ايتتى.
2024 جىلى ەكى ەل اراسىنداعى تاۋار اينالىمى 470 ملن دوللاردى، ال 2025 جىلدىڭ العاشقى سەگىز ايىندا 547 ملن دوللارعا جەتكەن. ازەربايجان قازاقستان ەكونوميكاسىنا 225 ملن دوللار، ال قازاقستان ازەربايجانعا 136 ملن دوللار ينۆەستيتسيا سالعان.
اليەۆ ورتا ءدالىزدىڭ ماڭىزىنا توقتالىپ، اقتاۋ مەن اليات پورتتارى ارقىلى جۇك تاسىمالىنىڭ ارتقانىن جانە ەكى ەلدىڭ لوگيستيكالىق ينفراقۇرىلىمدى جاڭعىرتىپ جاتقانىن ايتتى.
سونداي-اق، «قازمۇنايگاز» جانە SOCAR كومپانيالارى اراسىنداعى اقتاۋ–دجەيحان باعىتى بويىنشا مۇناي ءترانزيتى جونىندەگى كەلىسىم ەنەرگەتيكالىق سەرىكتەستىكتى كۇشەيتىپ وتىرعانىن مالىمدەدى.
پرەزيدەنت مادەني بايلانىستارعا دا نازار اۋداردى.
2023 جىلى ازەربايجاندا قازاق مادەنيەتىنىڭ، ال 2024 جىلى قازاقستاندا ازەربايجان مادەنيەتىنىڭ كۇندەرى ءوتتى. ول سونداي-اق كەمەل توقاەۆتىڭ «تۇندە اتىلعان وق» كىتابىنىڭ ازەربايجان تىلىندە جارىق كورۋىن باۋىرلاستىق قارىم-قاتىناستىڭ ايعاعى دەپ اتادى.
كاسپي تەڭىزىنىڭ تايىزدانۋ ماسەلەسىنە قاتىستى يلحام اليەۆ ەكولوگيالىق تەپە-تەڭدىكتى ساقتاۋ ءۇشىن كاسپي ماڭى ەلدەرىنىڭ عىلىمي جانە پراكتيكالىق ىنتىماقتاستىعىن كۇشەيتۋ قاجەت ەكەنىن ايتتى.
سونداي-اق، اليەۆ تۇركى مەملەكەتتەرى ۇيىمىنىڭ ەلدەر اراسىنداعى باۋىرلاستىق پەن ينتەگراتسيانى تەرەڭدەتۋدەگى ءرولىن جوعارى باعالادى.
«تمۇ ەلدەرى اراسىنداعى بايلانىستار ءبىزدىڭ تۇركى الەمىنىڭ ساياسي جانە ەكونوميكالىق قۋاتىن ارتتىرۋعا مۇمكىندىك بەرەدى»، – دەدى ول.
ايتا كەتەيىك، 1991 جىلى 18 قازاندا ازەربايجان تاۋەلسىزدىگىن جاريالاعان. ال 2021 جىلى بۇل كۇن «تاۋەلسىزدىكتىڭ قالپىنا كەلتىرىلگەن كۇنى» دەگەن اتاۋدى يەلەندى. اتاۋدىڭ وزگەرۋىنە 2020 جىلعى قاراباقتى ازات ەتۋ سوعىسىنداعى جەڭىس سەبەپ بولعان. بۇل سۇحبات وسى كۇنمەن تۇسپا-تۇس جاريالانىپ وتىر.
ەسكە سالا كەتەيىك، 20-21 قازان كۇندەرى ازەربايجان باسشىسى يلحام اليەۆ قازاقستانعا مەملەكەتتىك ساپارمەن كەلەدى
