ۋكراينالىق "حوچۋ جيت" جوباسى ۋكراينادا رەسەي اسكەرى قاتارىندا سوعىسىپ، قازا بولدى دەگەن قازاقستاندىقتاردىڭ ءتىزىمىن جاريالادى، دەپ حابارلايدى “ادىرنا”.
تىزىمدە 270 ادامنىڭ اتى-ءجونى بار. ولار سوعىس كەزىندە قازا بولعان نەمەسە ءىز-ءتۇزسىز جوعالعان قازاقستان ازاماتتارى دەلىنەدى. جوبا اۆتورلارىنىڭ ايتۋىنشا، ءتىزىم تولىق ەمەس – قازا بولعاندار مەن جوعالعانداردىڭ سانى ودان دا كوپ بولۋى مۇمكىن.
“قازا بولعانداردىڭ ەڭ جاسى – اندرەي بوگومولوۆ، 2005 جىلى تۋعان. ول 19 جاسىندا قازا بولعان. ەڭ ۇلكەنى – 254-موتواتقىشتار پولكىنىڭ مۇشەسى 64 جاستاعى الەكساندر يالفيموۆ” دەپ جازىلعان حابارلامادا.
قازاقستاندا رەسەيلىك جالداۋشىلار تىكەلەي ينتەرنەت جارناماسى مەن "رەسەيدە جوعارى جالاقى تولەنەتىن جۇمىس" ۇسىناتىن جالعان جۇمىسقا ورنالاستىرۋ اگەنتتىكتەرى ارقىلى ارەكەت ەتەدى دەپ حابارلانادى.
ء“بىزدىڭ مالىمەتىمىز بويىنشا، رەسەي كەيبىر "الىس" ەلدەردەن جالداۋ پروتسەسىنەن بىرتىندەپ باس تارتىپ، تىلدىك كەدەرگىسى تومەن كورشىلەس مەملەكەتتەرگە باسىمدىق بەرىپ وتىر. بۇل قازاقستان رەسپۋبليكاسىنىڭ بيلىگى مەن قوعامى رەسەيلىك جالداۋ جەلىلەرىنە قارسى كۇرەستى كۇشەيتۋى قاجەت ەكەنىن بىلدىرەدى. ايتپەسە، رەسەي قازاقستان ازاماتتارىن ولىمگە جىبەرە بەرمەك”، – دەلىنگەن جاريالانىمدا.
قازاقستاندا جالدامالى رەتىندە سوعىسقاندار قىلمىستىق جاۋاپكەرشىلىككە تارتىلادى. باسقا ەل اۋماعىنداعى ۇرىستارعا جالدامالىلىق بەلگىلەرى بولماسا دا قاتىسقاندار 5 جىلدان 9 جىلعا دەيىن باس بوستاندىعىنان ايىرىلۋى مۇمكىن. ال جالدامالىلىق ءۇشىن – 7 جىلدان باستاپ ءومىر بويىنا دەيىن باس بوستاندىعىنان ايىرۋ، ازاماتتىقتان ايىرۋ جانە مۇلكىن تاركىلەۋ جازاسى قاراستىرىلعان.
ايتا كەتەيىك، "حوچۋ جيت" – ۋكراينا ۇكىمەتىنىڭ اسكەري تۇتقىندارمەن جۇمىس جونىندەگى ۇيلەستىرۋ شتابى جۇزەگە اسىراتىن مەملەكەتتىك جوبا. ول رەسەي قارۋلى كۇشتەرىنىڭ ءومىرىن ساقتاپ، قاۋىپسىز جاعدايدا تۇتقىنعا بەرىلگىسى كەلەتىن اسكەري قىزمەتشىلەرىنە، موبيليزاتسيا قاۋپى بار رەسەي ازاماتتارىنا، سونداي-اق ۋكراينا جاعىنا وتكىسى كەلەتىن رەسەيلىك اسكەري جانە بەيبىت تۇرعىندارعا كومەك كورسەتۋگە باعىتتالعان.
