رەسەي پرەزيدەنتى ۆلاديمير پۋتين العاش رەت بريانسك جانە كۋرسك وبلىستارىنداعى تەمىرجول كوپىرلەرىنىڭ قۇلاۋىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ول بۇل وقيعالاردى "تەرروريزم" جانە "ازاماتتىق حالىققا قاساقانا جاسالعان سوققى" دەپ اتاپ، ۋكراينانى رەسەيمەن كەلىسسوزدەردى بولدىرماۋ ءۇشىن وسىنداي ارەكەتكە باردى دەپ ايىپتادى.
ءپۋتيننىڭ ايتۋىنشا، بۇل شابۋىلدار ستامبۋلدا 2 ماۋسىم كۇنى وتكەن رەسەي مەن ۋكراينا دەلەگاتسيالارى اراسىنداعى كەلىسسوزدەرگە دەيىنگى ۋاقىتتا ورىن العانى — ولاردىڭ كەزدەيسوق ەمەس، ادەيى ۇيىمداستىرىلعانىن كورسەتەدى.
"بۇل — كەلىسسوز پروتسەسىن بۇزۋعا باعىتتالعان ارەكەت. ۋكراينا بيلىگى بەيبىتشىلىككە ۇمتىلمايدى، كەرىسىنشە، ۋاقىتتى قارۋلانۋ مەن جاڭا شابۋىلدارعا دايىندىق ءۇشىن پايدالانۋعا تىرىسادى", — دەدى پۋتين ۇكىمەت مۇشەلەرىمەن وتكىزگەن جيىندا.پۋتين ۋكراينامەن كەلىسسوزدەر جۇرگىزۋگە دايىن ەمەس ەكەنىن تاعى ءبىر مارتە مالىمدەپ، كيەۆتى ء"بىتىم شارتتارىن الداپ پايدالانىپ كەلەدى" دەپ ايىپتادى. 2025 جىلدىڭ 31 مامىرىندا بريانسك وبلىسىندا كەشكى ۋاقىتتا تەمىرجول كوپىرى قۇلاپ، سول ساتتە وتپەك بولعان جولاۋشىلار پويىزى اپاتقا ۇشىرادى. رەسمي مالىمەت بويىنشا، 7 ادام قازا تاۋىپ، 66 ادام جاراقات العان. ونىڭ ىشىندە ءۇش بالا بار. وقيعا ورنىندا باستاپقىدا "جارىلىس بولعان" دەگەن بولجام ايتىلعانىمەن، كەيىنىرەك رەسەيدىڭ تەرگەۋ كوميتەتى بۇل مالىمەتتى رەسمي حابارلاماسىنان الىپ تاستاپ، تەك "قۇرىلىم قۇلادى" دەپ شەكتەلدى. ال كەلەسى كۇنى، 1 ماۋسىمدا كۋرسك وبلىسىنىڭ جەلەزنوگورسك اۋدانىندا جۇك پويىزى ءوتىپ بارا جاتقاندا تاعى ءبىر تەمىرجول كوپىرى قۇلادى. پويىزدىڭ بىرنەشە ۆاگونى اۆتوموبيل جولىنا قۇلاپ، ءورت شىقتى. ماشينيست پەن ونىڭ ەكى كومەكشىسى جاراقات الدى. وسى وقيعالارعا بايلانىستى رەسەيدىڭ تەرگەۋ كوميتەتى ەكى بىردەي قىلمىستىق ءىس قوزعاپ، كەيىن بۇل اپاتتاردى "تەراكت" دەپ تانىپ، ۋكرايناعا رەسمي ايىپ تاقتى. پۋتين ءوز مالىمدەمەسىندە ۋكراينا قاۋىپسىزدىك قىزمەتىنىڭ "ورمەك" وپەراتسياسى اياسىندا رەسەي اسكەري اەرودرومدارىنا جاسالعان شابۋىلدار مەن ستراتەگيالىق بومبالاۋشى ۇشاقتاردىڭ جويىلۋى، سونداي-اق قىرىم كوپىرىنىڭ تىرەگىنە جاسالعان شابۋىل تۋرالى بىردە-ءبىر ءسوز ايتپادى.
ۇقساس جاڭالىقتار
