بۇگىن تۇركىستان قالاسىنىڭ اكىمى ازىمبەك پازىلبەكۇلىنىڭ توراعالىعىمەن كەزەكتى اپپاراتتىق ءماجىلىس ءوتتى. جيىن بارىسىندا 2025–2026 جىلعى جىلۋ بەرۋ ماۋسىمىنا دايىندىق بارىسى جانە قالا اكىمدىگى تاراپىنان ورىندالۋعا ءتيىستى نەگىزگى مىندەتتەردىڭ جۇزەگە اسۋى تالقىلاندى.
كۇن تارتىبىندەگى العاشقى ماسەلە – الداعى قىسقى ماۋسىمعا دايىندىق جۇمىستارى بويىنشا كوممۋنالدىق شارۋاشىلىق ءبولىمىنىڭ باسشىسى ارمان وسپان مەن «جىلۋ» مەملەكەتتىك كوممۋنالدىق كاسىپورنىنىڭ ديرەكتورى ەرعازى رىسبەكوۆ بايانداما جاساپ، ناقتى كورسەتكىشتەردى ورتاعا سالدى.
بۇگىنگى تاڭدا قالا اۋماعىندا جالپى ۇزىندىعى 56,2 شاقىرىمدى قۇرايتىن جىلۋ جۇيەسى بار. ونىڭ ىشىندە 6,9 شاقىرىم ماگيسترالدىق، 49,3 شاقىرىم ىشكىورامدىق قۇبىرلار قامتىلعان. قالا بويىنشا 18 قازاندىق بولىمشەسىندە 77 قازان ورناتىلعان. ورتالىق جىلۋ جۇيەسىنە 223 كوپقاباتتى تۇرعىن ءۇي، ءبىلىم، دەنساۋلىق ساقتاۋ جانە مادەنيەت سالالارىنداعى 18 بيۋدجەتتىك مەكەمە، سونداي-اق كاسىپكەرلىك نىساندار مەن جەكە تۇرعىن ۇيلەر قوسىلعان.
بيىل كوكتەم ايلارىندا بارلىق قازاندىقتار مەن جىلۋ جۇيەلەرىندە قىسىمداۋ جانە شايۋ جۇمىستارى جۇرگىزىلىپ، انىقتالعان اقاۋلار تولىق جوندەلدى. قازىرگى تاڭدا ىستىق سۋمەن قامتۋ تۇراقتى تۇردە جۇزەگە اسۋدا. جىلۋ ماۋسىمى باستالار الدىندا قازاندىقتار تاعى دا تەكسەرىستەن وتەدى.
قالا اكىمى 15 قىركۇيەككە دەيىن بارلىق مەكتەپتەر، اۋرۋحانالار مەن بالاباقشالاردىڭ دايىندىق اكتىلەرىن بەكىتۋدى تاپسىردى. سونىمەن قاتار، ەلەكتر جانە گاز جەتكىزۋشىلەر الدىنداعى بەرەشەكتەردى وتەۋ ءۇشىن ناقتى ءىس-شارا جوسپارىن ازىرلەۋدى، دەبيتورلىق قارىزداردى ءوندىرىپ الۋ جۇمىستارىن كۇشەيتۋدى جانە اي سايىن قارىزدى ازايتۋ ديناميكاسىن كورسەتىپ وتىرۋدى مىندەتتەدى.
كۇن تارتىبىندەگى ەكىنشى ماسەلە – ورىنداۋشىلىق ءتارتىپتىڭ ساقتالۋى بويىنشا قۇجاتتاندىرۋدى قامتاماسىز ەتۋ ءبولىمىنىڭ باسشىسى بەكسۇلۋ جانىبەكقىزى بايانداما جاسادى. قالا اكىمى ورىنداۋشىلىق ءتارتىپتىڭ مەملەكەتتىك باسقارۋدىڭ ساپاسىن ايقىندايتىن باستى كورسەتكىش ەكەنىن اتاپ ءوتىپ، حاتتامالىق تاپسىرمالاردىڭ ۋاقىتىلى ورىندالۋى حالىق سەنىمىنە تىكەلەي اسەر ەتەتىنىن جەتكىزدى.
جيىن سوڭىندا ازىمبەك پازىلبەكۇلى جاۋاپتى سالا باسشىلارىنا ناقتى تاپسىرمالار جۇكتەپ، ولاردىڭ ورىندالۋىن قاتاڭ باقىلاۋدا بولاتىنىن جەتكىزدى.
ۇقساس جاڭالىقتار
