قازاقستان پرەزيدەنتى قاسىم-جومارت توقاەۆتىڭ وكىمىمەن الەكسەي تسوي مەملەكەت باسشىسىنىڭ الەۋمەتتىك ماسەلەلەر جونىندەگى كەڭەسشىسى لاۋازىمىنا تاعايىندالدى، دەپ حابارلايدى "ادىرنا" ۇلتتىق پورتالى.
بۇل تۋرالى رەسمي اقپارات اقوردانىڭ ءباسپاسوز قىزمەتى ارقىلى جاريالاندى.
«مەملەكەت باسشىسىنىڭ وكىمىمەن الەكسەي ۆلاديميروۆيچ تسوي قازاقستان رەسپۋبليكاسى پرەزيدەنتىنىڭ الەۋمەتتىك ماسەلەلەر جونىندەگى كەڭەسشىسى لاۋازىمىنا تاعايىندالدى»، – دەلىنگەن حابارلامادا.
الەكسەي تسوي 1977 جىلدىڭ 2 ساۋىرىندە شىمكەنت قالاسىندا دۇنيەگە كەلگەن. ول وڭتۇستىك قازاقستان مەملەكەتتىك مەديتسينا اكادەمياسىن، قازاقستان مەملەكەتتىك مەديتسينا اكادەمياسىنىڭ اسپيرانتۋراسىن، سونداي-اق رەسەي پرەزيدەنتى جانىنداعى حالىق شارۋاشىلىعى جانە مەملەكەتتىك قىزمەت اكادەمياسىنىڭ جوعارى كورپوراتيۆتىك باسقارۋ مەكتەبىن تامامداعان.
ول مانسابىن حيرۋرگ-ەندوسكوپيست رەتىندە باستاعان.
تسوي ءار جىلدارى پرەزيدەنت ءىس باسقارماسى مەديتسينالىق ورتالىعىنىڭ باسشىسى، دەنساۋلىق ساقتاۋ ۆيتسە-ءمينيسترى، ءارى كەيىن دەنساۋلىق ساقتاۋ ءمينيسترى قىزمەتتەرىن اتقارعان.
2022 جىلدىڭ 31 قازانىنان باستاپ پرەزيدەنت ءىس باسقارماسى مەديتسينالىق ورتالىعىن باسقارعان الەكسەي تسوي ەندى الەۋمەتتىك ساياسات باعىتىندا مەملەكەت باسشىسىنىڭ كەڭەسشىسى رەتىندە جۇمىسىن جالعاستىرادى.
