ماداگاسكار پرەزيدەنتى اندري رادزۋەلينا ءوزىنىڭ «قاۋىپسىز جەردە» ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
بۇعان دەيىن جەرگىلىكتى جانە حالىقارالىق باق ونىڭ ەلدەن كەتكەنىن حابارلاعان ەدى.
پرەزيدەنتتىڭ دۇيسەنبىگە جوسپارلانعان حالىققا جولداۋى بىرنەشە رەت كەيىنگە شەگەرىلدى. تىكەلەي ەفير كەزىندە رادزۋەلينا:
«بۇگىن ءوز ءومىرىمدى ساقتاۋ ءۇشىن جاسىرىنۋعا تۋرا كەلدى. بىراق وسىنداي جاعدايدا دا ەلدىڭ بولاشاعى ءۇشىن شەشىم ىزدەۋدى توقتاتقان جوقپىن»، — دەدى.
سونداي-اق ول ەلدە ۋشىعىپ تۇرعان ساياسي داعدارىستى شەشۋدىڭ جالعىز جولى — كونستيتۋتسيانى ساقتاۋ ەكەنىن اتاپ ءوتتى.
فرانتسۋزدىق RFI راديوسىنىڭ حابارلاۋىنشا، مەملەكەت باسشىسى جەكسەنبى كۇنى فرانتسيانىڭ اسكەري ۇشاعىمەن ەلدەن شىعارىلعان. بۇل اقپاراتتى وپپوزيتسيا جەتەكشىسى سيتەنى راندرياناسولونيايكو دا Reuters اگەنتتىگىنە راستادى.
ال ەل استاناسى انتاناناريۆۋ قالاسىندا نارازىلىق اكتسيالارى جالعاسۋدا. مىڭداعان ادام ورتالىق الاڭعا جينالىپ، پرەزيدەنتتىڭ وتستاۆكاسىن تالاپ ەتۋدە. كەيبىر اسكەري قىزمەتكەرلەر دە نارازىلار جاعىنا ءوتتى.
نارازىلىق تانىتۋشىلار الاڭدى «دەموكراتيا الاڭى» دەپ اتاعان.
