ەۋروپالىق وداق رەسەيدىڭ ۋكرايناعا قارسى قىلمىستارى ءۇشىن ءپۋتيندى سوتتايتىن ارنايى تريبۋنالدى قارجىلاندىرۋعا العاشقى 10 ميلليون ەۋرو قاراجات ءبولدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
بۇل تۋرالى كيەۆكە ساپارى بارىسىندا ەو-نىڭ سىرتقى ىستەر جانە قاۋىپسىزدىك ساياساتى جونىندەگى جوعارى وكىلى كايا كاللاس حابارلادى.
ونىڭ ايتۋىنشا، بولىنگەن قارجى تريبۋنال جۇمىسىنا جانە قىلمىس جاساعانداردى جازالاۋعا باعىتتالادى.
«رەسەيدىڭ ۋكرايناداعى سوعىس قىلمىستارى انىق. ەگەر مۇنداي ارەكەتتەر جازاسىز قالسا، جاڭا جاۋىزدىقتارعا جول اشىلادى»، – دەدى كاللاس.
سونىمەن قاتار، ەۋرووداق ۋكرايناعا قوسىمشا 6 ميلليون ەۋرو بولەدى. بۇل قاراجات رەسەي الىپ كەتكەن بالالار مەن سوعىس كەزىندە جىنىستىق زورلىق-زومبىلىققا ۇشىراعان قۇربانداردى قولداۋعا جۇمسالماق.
ارنايى تريبۋنال قۇرۋ تۋرالى كەلىسىم 25 ماۋسىمدا ستراسبۋرگتە ەۋروپا كەڭەسىنىڭ باس حاتشىسى الەن بەرسە مەن ۋكراينا پرەزيدەنتى ۆلاديمير زەلەنسكيدىڭ قول قويۋىمەن بەكىتىلگەن. تەرگەۋ 2014 جىلدان بەرگى وقيعالاردى قامتيدى.
الايدا حالىقارالىق قۇقىققا سايكەس، تريبۋنال رەسەي پرەزيدەنتى ۆلاديمير ءپۋتيندى تەرگەي العانىمەن، ونى سوتتاي المايدى. سەبەبى مەملەكەت باسشىلارى مەن جوعارى لاۋازىمدى تۇلعالار جەكە يممۋنيتەتكە يە.
ماسكەۋ بۇل باستامانى مويىنداماي وتىر. كرەملدىڭ ءباسپاسوز حاتشىسى دميتري پەسكوۆ ەو-نىڭ تريبۋنال قۇرۋ جوسپارىنا قاتىستى:ء «بىز بۇل باستاماعا ەشقانداي رەاكتسيا بىلدىرمەيمىز»، – دەگەن.
ال رەسەي قاۋىپسىزدىك كەڭەسى حاتشىسىنىڭ ورىنباسارى الەكساندر ۆەنەديكتوۆ ارنايى تريبۋنالدى «ەۋروپالىق حالىقتىڭ اقشاسىن يەمدەنۋدىڭ تاعى ءبىر امالى» دەپ اتادى.
