2026 جىلدىڭ باسىندا كاسىپكەرلەردىڭ ءتۇرلى قاۋىمداستىقتارى بىرىگىپ، «اتامەكەن» ۇلتتىق كاسىپكەرلەر پالاتاسىنا جارنا جيناۋعا قارسى پەتيتسيا جاريالاۋعا دايىندالىپ جاتىر، دەپ حابارلايدى "ادىرنا" ۇلتتىق پورتالى DALA INSIDE-قا سىلتەمە جاساپ.
دەرەككوزدىڭ ايتۋىنشا، بيزنەس وكىلدەرى قازىرگى تاڭدا بۇل پالاتادان ەشقانداي ناقتى پايدا كورىپ وتىرعان جوق. كەرىسىنشە، «اتامەكەن» كاسىپكەرلەردىڭ دامۋىنا كەدەرگى كەلتىرەتىن قوسىمشا توسقاۋىلعا اينالىپ بارادى.
"شاعىن كاسىپكەرلەردى ايتپاعاندا، پالاتا ورتا جانە ءىرى بيزنەس وكىلدەرىنىڭ دە كورپوراتيۆتى جانە قوسىلعان قۇن سالىعىنا قاتىستى قۇقىقتارىن قورعاي المادى. ۇكىمەتكە ءوز ءسوزىن وتكىزە الماي وتىر. كەيدە ءتىپتى بيزنەسكە زيان كەلتىرىپ جاتقانداي اسەر قالدىرادى. سوندىقتان كاسىپكەرلەر «پالاتانىڭ شىعىنىن بيزنەس ەمەس، ۇكىمەت وتەسىن» دەگەن پىكىردە", – دەيدى دەرەككوز.
مامانداردىڭ ايتۋىنشا، ەگەر كەلەسى جىلى كاسىپكەرلەر مەن «اتامەكەن» اراسىنداعى قايشىلىق شيەلەنىسە تۇسسە، 2027 جىلى پالاتانى تاراتۋ نەمەسە قايتا قۇرۋ ماسەلەسى كۇن تارتىبىنە شىعۋى مۇمكىن.
پالاتانىڭ قازىرگى توراعاسى رايىمبەك باتالوۆتىڭ جۇمىسى دا سىنعا ۇشىراۋدا. كاسىپكەرلەردىڭ ايتۋىنشا، باتالوۆتان ۇلكەن ءۇمىت بولعانىمەن، ول اقتالماعان. بۇرىنعى توراعا ابىلاي مىرزاحمەتوۆپەن سالىستىرعاندا، باتالوۆتىڭ داۋىسى قوعامدا ەستىلمەي وتىر.
"مۇندا ماسەلە جەكە تۇلعادا ەمەس. باسقا باسشى كەلسە دە، «اتامەكەن» ءتيىمدى بولا المايدى. ماسەلە ۇيىمنىڭ قۇرىلىمىندا. ول العاش قۇرىلعان كەزدە سول ۋاقىتتىڭ پروبلەمالارىن شەشۋ ءۇشىن جاسالدى. قازىر زامان وزگەردى، ال پالاتا سول كۇيىندە قالدى. نەمەسە ونى تۇبەگەيلى قايتا قۇرۋ قاجەت", – دەيدى دەرەككوز.
«اتامەكەن» ۇلتتىق كاسىپكەرلەر پالاتاسىنىڭ بيىلعى بيۋدجەتى 12 ميلليارد تەڭگەدەن اسادى. ونىڭ 10,7 ميللياردى كاسىپكەرلەر تولەيتىن جارنالاردان جينالادى. نەگىزگى جارنانى پالاتا ءىرى بيزنەس وكىلدەرىنەن الادى.
بۇل قاراجاتتىڭ باسىم بولىگى جالاقى، كەڭسە جالداۋ جانە قىزمەت كورسەتۋ شىعىندارىنا جۇمسالادى. كاسىپكەرلەردىڭ ايتۋىنشا، پالاتا قازىر بيزنەسكە ناقتى كومەك بەرمەي، «اتا-اناسى الىپ بەرگەن بالمۇزداقتى جەپ وتىرعان بالا» سەكىلدى كورىنەدى.
