ۇلىتاۋ وبلىسى اكىمى داستان رىسپەكوۆتىڭ توراعالىعىمەن كەزەكتى اپپارات جيىنى ءوتتى. كەڭەستە وقۋ جىلىنىڭ اياقتالۋى، ءبىلىم بەرۋ ۇيىمدارى ينفراقۇرىلىمىن دامىتۋ، شاعىن جانە ورتا بيزنەستى دامىتۋ ماسەلەلەرى كوتەرىلدى.
ءوڭىر باسشىسى وسى اپتادا كەلە جاتقان مەكتەپ ءبىتىرۋ كەشتەرىن وبلىس دەڭگەيىندە باقىلاۋعا الۋدى قاتاڭ تاپسىردى. وبلىس اكىمىنىڭ ايتۋىنشا، قاۋىپسىزدىك - العاشقى ورىندا. سول سەبەپتى مەكتەپ فورماتىنان تىس وتەتىن ءىس-شارالارعا پوليتسيا دەپارتامەنتى، اتا-انالار، مۇعالىمدەر تىكەلەي اتسالىسۋى ءتيىس، وعان قوسا، ۇلتتىق بىرىڭعاي تەستىلەۋ دە جوعارى دەڭگەيدەگى دايىندىقپەن ءوتۋى قاجەت.
وبلىس اكىمى ءبىلىم بەرۋ نىساندارىنا جوندەۋ جۇرگىزۋدە بيۋدجەت تيىمدىلىگىنە نازار قويۋدى ەسكەرتتى، ياعني، نىسان قۋاتتىلىعى مەن قاراجات شىعىنى سايكەس بولۋى قاجەت. وعان قوسا، ءوڭىر باسشىسى ءبىلىم بەرۋ نىساندارىن سالۋ، مەكتەپكە دەيىنگى ۇيىمدار ءىسىن جۇرگىزۋگە جەكە كاسىپكەرلەردى تارتۋ ءىسىن توقتاتپاۋدى ەسكەرتتى.
جيىندا وبلىس اكىمى شاعىن بيزنەستەن بولەك، شاعىن وندىرىستەردى دە دامىتۋعا نازار اۋدارۋدى جەتكىزدى. بۇل تۇرعىدا ءتيىستى ءىس-شارالار جوسپارىن ۇسىنۋ قاجەتتىگىن ايتتى. سونىمەن قاتار، كوپ جىلدان بەرى، قاراۋسىز قالعان بۇرىنعى تىگىن فابريكاسىنىڭ عيماراتىنا شۇعىل ارادا تەحنيكالىق زەرتتەۋ جۇرگىزىپ، جوندەۋ جۇمىستارىن جاساپ، «ۇلىتاۋ» اكك ارقىلى كاسىپكەرلەرگە ورىندار بەرۋدى تاپسىردى.
