يزرايل مەن پالەستينالىق حاماس قوزعالىسى اراسىنداعى اتىستى توقتاتۋ رەجيمى 10 قازان كۇنى جەرگىلىكتى ۋاقىتپەن ساعات 12:00-دە كۇشىنە ەندى. بۇل تۋرالى يزرايل قورعانىس ارمياسى (تساحال) مالىمدەدى، دەپ حابارلايدى “ادىرنا”.
كەلىسىم اياسىنداعى نەگىزگى شارتتار الداعى 24 ساعاتتا جۇزەگە اسۋى ءتيىس.
Times of Israel باسىلىمىنىڭ مالىمەتىنشە، يزرايل اسكەرى گازا سەكتورىنان ءىشىنارا شىعىپ، جاڭا دەماركاتسيالىق شەپتەر بويىنشا پوزيتسيالار الۋدا. العاشقى اسكەري بولىمشەلەر گازادان ءتۇن ىشىندە شىعارىلدى. كەيبىر اۋدانداردا اسكەردى اكەتۋ كەزىندە ارتيللەريالىق جانە اۋە سوققىلارى جاسالىپ، اسكەرگە قولداۋ كورسەتىلدى.
قيراعان اۋداندارعا تۇرعىنداردىڭ ءبىر بولىگى قايتا ورالا باستاعان. دەگەنمەن، يزرايل اسكەرى گازا تۇرعىندارىن بىرنەشە اۋداننىڭ ءالى دە "وتە قاۋىپتى" ەكەنىن ەسكەرتىپ وتىر.
اقش پرەزيدەنتى دونالد ترامپ ۇسىنعان گازا بويىنشا بەيبىت جوسپاردىڭ العاشقى كەزەڭى تۇتقىندارمەن الماسۋدى قامتيدى. يزرايل باستاپقىدا فاتح قوزعالىسىنىڭ مۇشەلەرى بولعان 11 ادامدى بوساتۋى ءتيىس ەدى. الايدا سوڭعى ساتتە شەشىم وزگەرىپ، ورنىنا حاماس ۇيىمىنىڭ 11 مۇشەسى بوساتىلادى، ولاردىڭ توعىزى ءومىر بويىنا سوتتالعان.
سونىمەن قاتار، يزرايل تۇرمەلەرىنەن 250 پالەستينالىق جانە سوعىس باستالعاننان بەرى (2023 جىلعى 7 قازاننان باستاپ) ۇستالعان 1700 ادام بوساتىلادى.
بۇل شەشىم يزرايل قوعامىندا قاراما-قايشى رەاكتسيا تۋدىردى. تەرروريستىك شابۋىلداردان زارداپ شەككەندەردىڭ تۋىستارى تۇتقىنداردى بوساتۋعا قارسىلىق ءبىلدىرىپ، بوساتىلاتىنداردىڭ ءتىزىمىن جاريالاۋدى تالاپ ەتتى.
تۇركيا قورعانىس مينيسترلىگى ءوز اسكەرىن گازاعا بىتىمگەرشىلىك ميسسياسىمەن جىبەرۋگە دايىن ەكەنىن مالىمدەدى.
گەرمانيا كانتسلەرى فريدريح مەرتس يزرايل مەن حاماس اراسىنداعى بەيبىت جوسپاردى جۇزەگە اسىرۋعا جان-جاقتى كومەك كورسەتەتىنىن جەتكىزدى. الايدا، گەرمانيا اسكەرى بىتىمگەرشىلىككە قاتىسپايدى. گەرمانيا پالەستينالىق بەيبىت تۇرعىندارعا كومەك رەتىندە 29 ميلليون ەۋرو بولەدى.
ەسكە سالساق، 2023 جىلعى 7 قازاندا حاماس قوزعالىسى يزرايلگە ءىرى شابۋىل جاساپ، 1200-گە جۋىق ادامدى ءولتىرىپ، 250-گە جۋىق ادامدى تۇتقىنعا العان بولاتىن. بۇل وقيعا يزرايل تاريحىنداعى ەڭ قاندى شابۋىل رەتىندە تىركەلدى.
جاۋاپ رەتىندە يزرايل حاماس-قا قارسى سوعىس جاريالادى. قارۋلى قاقتىعىستار مەن اۋە سوققىلارى سالدارىنان، حاماس باقىلاۋىنداعى گازا دەنساۋلىق ساقتاۋ مينيسترلىگىنىڭ دەرەگى بويىنشا، 67 مىڭنان استام پالەستينالىق قازا تاۋىپ، 169 مىڭنان استامى جارالاندى. بۇل ستاتيستيكانىڭ ناقتىلىعى تۋرالى دەرەكتەر ناقتى كورسەتىلمەگەن.
قىركۇيەك ايىندا اقش-تا يزرايل پرەمەر-ءمينيسترى بينيامين نەتانياحۋ مەن دونالد ترامپ گازا سەكتورىنا قاتىستى بەيبىت جوسپار ۇسىندى. قازان ايىنىڭ باسىندا حاماس تاراپىنان جوسپارعا ءىشىنارا قولداۋ ءبىلدىرىلدى. 6 قازاندا مىسىردا ەكى تاراپ دەلدال ارقىلى العاشقى كەلىسسوزدەرىن وتكىزدى.
