10 قازاندا ۇلتتىق بانك باعانىڭ شەكتەن تىس وسۋىنە قارسى قاتاڭ قادام جاسادى – بازالىق مولشەرلەمە بۇرىنعى 16,5%-دان 18%-عا كوتەرىلدى. مۇنى رەتتەۋشى باعانىڭ شەكتەن تىس ءوسىپ كەتۋىمەن تۇسىندىرەدى، دەپ حابارلايدى "ادىرنا".
«ينفلياتسيانىڭ كۇشەيۋى، سۇرانىستىڭ ۇسىنىستان اسىپ ءتۇسۋى جانە بەلسەندى فيسكالدىق ساياسات اياسىندا اقشا-كرەديت شارتتارىنىڭ جۇمسارۋى باعانىڭ شەكتەن تىس وسۋىنە قاۋىپ تۋعىزدى. وسىعان بايلانىستى ينفلياتسيانىڭ ديناميكاسىن تۇراقتاندىرىپ، باعانىڭ باقىلاۋدان شىعۋىنا جول بەرمەۋ ءۇشىن شەشىمدى قادام جاساۋعا تۋرا كەلدى»، – دەپ جازىلعان قارجى ۇيىمىنىڭ سايتىندا.
رەتتەۋشىنىڭ تۇسىندىرۋىنشە، بارلىق نەگىزگى مەتريكا بويىنشا ينفلياتسيانىڭ وسكەنى بايقالدى. جىلدىق ينفلياتسيا قىركۇيەكتە 12,9%-عا دەيىن قارقىن الىپ ، ۇلتتىق بانكتىڭ بولجامىنان اسىپ ءتۇستى.
ءوندىرىس شىعىندارى، يمپورت قۇنىنىڭ وسۋىنە بايلانىستى ازىق-تۇلىك تە قارقىندى قىمباتتاپ جاتىر. جانار-جاعارماي نارىعىن ىرىقتاندىرۋ شارالارىن جالعاستىرۋ اياسىندا ازىق-تۇلىككە جاتپايتىن ينفلياتسيا قارقىن الا باستادى (10,8%) – وتىن باعاسى ءبىر جىلدا 11,9%-عا قىمباتتاپ، قىركۇيەكتە 3,4%-عا ءوستى.
«سىرتقى ينفلياتسيالىق اسەر ءالى ساقتالىپ وتىر. سونىمەن بىرگە، ەڭ الدىمەن، الەمدىك ازىق-تۇلىك نارىقتارى جاعىنان تاۋەكەل كۇشەيە ءتۇستى. سوڭعى جىلدارى ەت پەن وسىمدىك مايى ساناتتارىندا باعا جاعىنان رەكوردتىق ءوسىم بايقالدى. ولاردىڭ ديناميكاسى بەلسەندى ىشكى ەكسپورت جاعدايىندا ىشكى باعالاردىڭ وسۋىنە اسەر ەتەدى» ، – دەپ تۇسىندىرەدى ۇلتتىق بانك.
2025 جىلعى قاڭتار-تامىز ايلارىنداعى ەكونوميكانىڭ وسۋى جىلدىق ماندە 6,5%-عا دەيىن جەدەلدەدى. بىراق بۇل ءوسىم بيۋدجەتتىك ەكسپانسياعا جانە ىشكى تۇتىنۋعا تاۋەلدى سەكتورلاردا شوعىرلانىپ تۇر دەيدى ماماندار. سۇرانىستىڭ ۇسىنىس مۇمكىندىكتەرىنەن اسىپ ءتۇسۋ بەلگىلەرى كۇشەيىپ، يمپورتتىڭ تيىسىنشە وسۋىنە الىپ كەلىپ وتىر. قوسىمشا ديناميكانى بەلسەندى تۇتىنۋشىلىق نەسيەلەۋ مەن جوعارى ينفلياتسيالىق كۇتۋلەر بەردى.
«ينفلياتسيانىڭ ايتارلىقتاي جەدەلدەۋى، جوعارى ينفلياتسيالىق كۇتۋلەر مەن ناقتى ءتيىمدى ايىرباستاۋ باعامىنىڭ السىرەۋى جيىنتىق اقشا-كرەديت شارتتارىنىڭ ەلەۋلى تۇردە جەڭىلدەۋىنە جانە بولجامدى ينفلياتسيانىڭ ورنىقتى تومەندەۋ تراەكتورياسىنان اۋىتقۋىنا الىپ كەلدى. وسى جاعدايلاردا، ينفلياتسيانىڭ ناقتى دەڭگەيى بولجامنان اسىپ تۇسكەنىنە بايلانىستى اقشا-كرەديت ساياساتىن قاتاڭداتۋ ماقساتىندا كوميتەت بازالىق مولشەرلەمەنى ارتتىرۋ تۋرالى شەشىم قابىلدادى»، – دەپ جازىلعان ۇلتتىق بانك حابارلاماسىندا.
ەگەر بۇل دەڭگەي جەتكىلىكسىز بولسا، بولاشاقتا ودان ءارى قاتاڭداتۋى مۇمكىن ەكەنىن دە ەسكەرتتى.
