ۇلىبريتانيانىڭ جيىرمادان استام دەپۋتاتى مەن لوردتار پالاتاسىنىڭ مۇشەلەرى ەلدىڭ سىرتقى ىستەر مينيسترىنە قىرعىزستانداعى مەكەمەلەر مەن جەكەلەگەن تۇلعالارعا قارسى شارا قابىلداۋعا شاقىردى. ولاردىڭ پىكىرىنشە، بۇل قۇرىلىمدار رەسەيگە قارسى سانكتسيالاردى اۋقىمدى تۇردە اينالىپ وتۋگە ىقپال ەتىپ وتىر، دەپ حابارلايدى «ادىرنا» ءتىلشىسى The Guardian-عا سىلتەمە جاساپ.
پارلامەنتاريلەردىڭ ايتۋىنشا، ەرەكشە الاڭداتاتىن ماسەلە — رۋبلگە بايلانعان رەسەيلىك A7A5 ستەيبلكوينى.
«A7A5 رەسەيدىڭ سانكتسياعا ۇشىراعان جەكە جانە زاڭدى تۇلعالارى ءۇشىن سانكتسيالاردى اينالىپ ءوتۋدىڭ نەگىزگى پلاتفورماسى رەتىندە جۇمىسىن جالعاستىرىپ، كەڭەيىپ كەلەدى. ەسەپكە سايكەس، ونىڭ ساقتالىپ تۇرۋىنىڭ باستى سەبەپتەرىنىڭ ءبىرى — قىرعىزستانداعى قارجى مەكەمەلەرى مەن مەملەكەتتىك ورگانداردىڭ ىنتىماقتاستىعى، ولار A7A5-ءتى العاش تىركەگەن قۇرىلىمدار. سانكتسيالارعا قاراماستان، قىرعىزستان A7A5 پەن وعان بايلانىستى ۇيىمدارعا قاۋىپسىز ورتا جاساپ وتىر»، — دەلىنگەن حاتتا.
اۆتورلار قىرعىزستاننىڭ سانكتسيالاردى اينالىپ وتۋدە ماڭىزدى ءرول اتقارىپ وتىرعانىن مالىمدەدى.
«قىرعىزستانعا قاتىستى شارا قولداناتىن ۋاقىت كەلدى. رەسەيدىڭ سانكتسيالاردى اشىق تۇردە اينالىپ وتۋىنە قاتىسى بار قىرعىز شەنەۋنىكتەرى جاۋاپقا تارتىلۋى ءتيىس. ءبىز قىرعىزستان ۇلتتىق بانكىنىڭ باسشىسى مەلىس تۇرعىنباەۆقا، باس پروكۋرور ماقسات اساناليەۆكە جانە قارجى رەتتەۋ ورگانىنىڭ جەتەكشىسى مارات پىرنازاروۆقا قاتىستى جەكە سانكتسيالار ەنگىزۋدى قاتاڭ تۇردە تالاپ ەتەمىز»، — دەلىنگەن ۇندەۋدە.
سونىمەن قاتار ولار ەگەر قىرعىزستان ۇكىمەتى ۇلىبريتانيا سانكتسيالارىنا قارسى ارەكەتىن جالعاستىرسا، وندا ەلگە قارسى اۋقىمدى سالالىق سانكتسيالار ەنگىزۋ ماسەلەسىن قاراستىرۋ قاجەت ەكەنىن ەسكەرتكەن.
