Алматыда көлік қозғалысын ретке келтіру және жолдағы кептелістердің алдын алу мақсатында бірнеше жол қиылысына жаңа жол таңбасы — «вафельница» сызылды, деп хабарлайды "Адырна" ұлттық порталы ҚазАқпаратқа сілтеп.
Алматы полиция департаментінің мәліметінше, бұл таңба Абай – Назарбаев, Абай – Момышұлы және Төле би – Розыбакиев көшелерінің қиылыстарында пайда болған.
«Вафельді» таңбаның негізгі мақсаты — жүргізушілерге қиылыс бос болмаса, оған кіруге болмайтынын ескерту. Мұндай белгі Қазақстан Республикасының жол қозғалысы қағидаларында бар және көлік ағынын тиімді басқаруға бағытталған.
— Бұл шара жиі кездесетін жасанды кептелістерді азайтуға бағытталған. Мұндай жағдайлар көбінесе жүргізушілердің бос емес қиылысқа шығуынан туындайды. Жаңа таңба көлік қозғалысын реттеп, жол қауіпсіздігін арттыруға көмектеседі, — деді Алматы ПД Әкімшілік полиция басқармасының бастығы Асхат Құлбаев.
Айта кетейік, бұған дейін Алматы әкімдігі қаладағы көлік жүктемесін азайту үшін жұмыс уақытының кестесін өзгерту, сондай-ақ қашықтан жұмыс істеу форматын кеңейту сияқты шараларды қолға алған болатын.
