رەسەيدىڭ «ۆاگنەر» جەكە اسكەري كومپانياسى قۇرامىندا ۋكراينا مەن مالي اۋماعىندا سوعىسقان قازاقستاندىق تيمۋر پراليەۆ الماتىدا 5 جىلعا باس بوستاندىعىنان ايىرىلدى، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
سوت مالىمەتىنشە، پراليەۆ 2022 جىلدىڭ كۇزى مەن 2023 جىلدىڭ باسىندا رەسەي تاراپىنان جالدانىپ، ۋكرايناداعى قاقتىعىسقا قاتىسقان. ول بايلانىسشى قىزمەتىن اتقارىپ، باحمۋت قالاسىن باسىپ الۋ وپەراتسيالارىندا بولعان.
باق حابارلاۋىنشا، ازاماتقا رەسەي تاراپى بىرنەشە مەدال تاپسىرعان جانە ازاماتتىق بەردى.
2024 جىلى پراليەۆ «ۆاگنەر» توبىنىڭ مۇشەسى رەتىندە افريكاداعى مالي ەلىندە دە اسكەري وپەراتسيالارعا قاتىسقان. بۇل ەۆگەني پريگوجيننىڭ بۇلىگىنەن كەيىن، «ۆاگنەر» جاۋىنگەرلەرىنىڭ ءبىر بولىگى افريكاعا اۋىستىرىلعان كەزەڭگە سايكەس كەلەدى.
سوت پراليەۆتى قازاقستان قىلمىستىق كودەكسىنىڭ 172-بابى (شەتەلدىك قارۋلى قاقتىعىستارعا قاتىسۋ) بويىنشا كىنالى دەپ تانىپ، 5 جىل مەرزىمگە باس بوستاندىعىنان ايىردى.
تەرگەۋ بارىسىندا ونىڭ رەسەي تاراپىنان جالپى 4,16 ميلليون رۋبل كولەمىندە اقشا العانى انىقتالعان.
2024 جىلدىڭ قازان ايىندا ول «ۆاگنەر» قاتارىنان شىققاننان كەيىن بەلارۋس پەن رەسەيدە ەم قابىلداپ، كەيىن مەكسيكاعا بارعان.
2025 جىلدىڭ 4 قاڭتارىندا اقش شەكاراسىندا زاڭسىز وتۋگە تىرىسقان كەزىندە پراليەۆ ۇستالىپ، دەپورتاتسيالانعان. ونىڭ جانىنان قازاقستان جانە رەسەي پاسپورتتارى، 4 مىڭ دوللار، 60 مىڭ مەكسيكالىق پەسو جانە درون تابىلعان.
قورعاۋشىلار ءىستى رەسەيدە قاراۋدى سۇراعانىمەن، سوت پراليەۆتىڭ تەك قازاقستان ازاماتى بولعانىن انىقتاپ، بۇل ءوتىنىشتى قابىلداماعان.
