Reseidıŋ «Vagner» jeke äskeri kompaniiasy qūramynda Ukraina men Mali aumaǧynda soǧysqan qazaqstandyq Timur Praliev Almatyda 5 jylǧa bas bostandyǧynan aiyryldy, dep habarlaidy "Adyrna" ūlttyq portaly Orda.kz-ke sıltep.
Sot mälımetınşe, Praliev 2022 jyldyŋ küzı men 2023 jyldyŋ basynda Resei tarapynan jaldanyp, Ukrainadaǧy qaqtyǧysqa qatysqan. Ol bailanysşy qyzmetın atqaryp, Bahmut qalasyn basyp alu operasiialarynda bolǧan.
BAQ habarlauynşa, azamatqa Resei tarapy bırneşe medal tapsyrǧan jäne azamattyq berdı.
2024 jyly Praliev «Vagner» tobynyŋ müşesı retınde Afrikadaǧy Mali elınde de äskeri operasiialarǧa qatysqan. Būl Evgenii Prigojinnıŋ bülıgınen keiın, «Vagner» jauyngerlerınıŋ bır bölıgı Afrikaǧa auystyrylǧan kezeŋge säikes keledı.
Sot Pralievtı Qazaqstan Qylmystyq kodeksınıŋ 172-baby (şeteldık qaruly qaqtyǧystarǧa qatysu) boiynşa kınälı dep tanyp, 5 jyl merzımge bas bostandyǧynan aiyrdy.
Tergeu barysynda onyŋ Resei tarapynan jalpy 4,16 million rubl kölemınde aqşa alǧany anyqtalǧan.
2024 jyldyŋ qazan aiynda ol «Vagner» qatarynan şyqqannan keiın Belarus pen Reseide em qabyldap, keiın Meksikaǧa barǧan.
2025 jyldyŋ 4 qaŋtarynda AQŞ şekarasynda zaŋsyz ötuge tyrysqan kezınde Praliev ūstalyp, deportasiialanǧan. Onyŋ janynan Qazaqstan jäne Resei pasporttary, 4 myŋ dollar, 60 myŋ meksikalyq peso jäne dron tabylǧan.
Qorǧauşylar ıstı Reseide qaraudy sūraǧanymen, sot Pralievtıŋ tek Qazaqstan azamaty bolǧanyn anyqtap, būl ötınıştı qabyldamaǧan.
