قوستاناي جانە اقمولا وبلىستارىنداعى اۋىل شارۋاشىلىعى تەحنيكالارىنىڭ جۇرگىزۋشىلەرى ديزەل وتىنىنىڭ ساپاسىنا نارازىلىق ءبىلدىردى، دەپ حابارلايدى "ادىرنا" ۇلتتىق پورتالى.
ولار پايدالانىپ جۇرگەن سولياركا پارافيندەنىپ، فيلترلەردى بىتەپ، تەحنيكانى ىستەن شىعارىپ جاتقانىن ايتۋدا. بۇل جاعداي ءدال ەگىن ورۋ ناۋقانىنىڭ قىزعان شاعىندا ورىن الىپ وتىر.
بۇل تۋرالى «فوند-بيۋرو راسسلەدوۆانيا كوررۋپتسي» تەلەگرام-ارناسى مەن Agroblog.kz پاراقشاسى حابارلادى. ديقانداردىڭ ايتۋىنشا، اتىراۋدان جەتكىزىلگەن سولياركا قوستاناي وبلىسىندا تەحنيكالارعا ايتارلىقتاي زيان كەلتىرۋدە.
«اتىراۋلىق سولياركا قوستاناي وبلىسىنا كەلدى. بىرەۋلەر وسى وتىننىڭ مۇددەسىن قورعاعان سياقتى. تراكتور ۇنەمى توقتاپ قالادى – فيلتر پارافينمەن بىتەلىپ قالادى. قازىر +8 گرادۋس، بىراق سولياركا جۇمىس ىستەمەيدى. ءۇش شاقىرىمدى ەكى ساعاتتا جۇرەمىز، قىزدىرساق تا پايداسى جوق»، – دەيدى مەحانيزاتورلاردىڭ ءبىرى.
ۇقساس جاعداي اقمولا وبلىسىنىڭ شارۋالارىندا دا بايقالعان. ولارعا بەرىلگەن كەپىلدەندىرىلگەن كولەمدەگى ديزەل وتىنى ماۋسىمارالىق جاعدايدا پايدالانۋعا جارامسىز بولىپ شىققان.
«كەپىلدەندىرىلگەن ديزەل وتىنى ارتىق شىعىنسىز ورۋ جۇمىستارىن اياقتاۋعا كومەكتەسەدى دەپ ويلادىق، بىراق قازىر تەحنيكالار ىستەن شىعىپ، ۋاقىت جوعالتىپ جاتىرمىز. ءار ساعات ماڭىزدى، ال تەحنيكا قاڭتارىلىپ تۇر»، – دەيدى فەرمەرلەر.
بيىل اقمولا وبلىسىنا 94 مىڭ توننا ارزانداتىلعان ديزەل وتىنى بولىنگەن، ءليترى 254 تەڭگەدەن. بۇعان قوسا، ەنەرگەتيكا مينيسترلىگى وڭىرگە جانە وزگە ايماقتارعا كەپتىرگىش اگرەگاتتار ءۇشىن 67,7 مىڭ توننا قوسىمشا وتىن جىبەرگەن.
